Saturday, April 30, 2011

BALIKBAYANS KEN TURISTA, KINAMAKAMDA TI SEMANA SANTA KEN PANAGPIESTA TI CABUGAO

Nagdadarison dagiti nagsangpet a balikbayans ken turista a naggapu iti Mainland,  USA,  Hawaii,  dadduma a pagilian ti Asia ken Europa kasta met dagiti naggapu iti Kamanilaan  iti kasakbayan a lawas  ti Semana Santa (Abril 18-22).

Sakbayna, bimmisita dagiti agassawa,  Mayor Ediboy S. Cobangbang, Jr. ken Mrs. Jerlie Seguban-Cobangbang sadiay abroad ket inkanayonda ti nagawis ti kakailianda a bumisita met iti ili a nakayanakan ken naggapuanda.

Gapu itoy,  immadu ti kimmarayo ken natignay dagiti Cabugaoenians nga agnanaed iti abroad ket kaaduan ti nagawid kadakuada tapno makipagrambakda ti panagpiesta ti ilida iti bulan ti Abril 2011.

Pinaboran ti napintas a paniempo ti panagpasiar, pannakiinniliw, ken pannakipagselebrar dagiti balikbayans ken turista. Saan met a nakraayan ti naruay a nagsalinong kadagiti beach resorts, cottages, hotels ken beaches iti igid ti kabaybayan ti ili ken nagpasiar pay kadagiti kabangibang a tourist sites kangrunaan  iti Baluarte Resorts ken Heritage City of Vigan.

Iti pannakamantener ti linak ken talna kabayatan ti selebrasion a nangpatalged ti rikna dagiti bisbisita, pinadayawan ti Gobierno Lokal iti kapolisan ti ili ti Cabugao  babaen ti panangtarawidwid ni P/Inspector William Nerona.

Naaramid ti Ragsak Cabugao Festival: Search Bb. Cabugao 2011, Abril 27; Balik-Cabugao, Abril 25; Search for Cabugao Lolo and Lola, Little Mr. & Ms. Day Care, Abril 26; Cabugao Jobs Fair, Abril 27;  Marching Band Competition, Abril 28; Championship, Basketball Tournament, Abril 29.

Napnek dagiti balikbayans a nakisosial kadagiti rabii ti Piesta  ken nakiinniliw kadagiti patpatgenda ken kakabagianda sakbay a nagawidda. “Umaykam’to manen, Kaka!” sangkakunada. (Insurat ni Joed Sajonia/Anara-ar)

No comments:

Post a Comment