Cabugao, Ilocos Sur – Iti pannakiuman ti Web In-Action idi Disiembre 4, 2013, imbatad ni Market Supervisor Norma S. Bertumen a kankanayon ti panagdaldalusda iti Tiendaan nangruna iti kakarnean ken pagikanan. Maar-aramid ti “Flushing” dagiti pagparabawan ti lako ken iti basement tapno maikkat dagiti madi nga angot ket presko latta met ti angsen dagiti aglako ken aggatang.
Kasakbayan ti Paskua 2013, innayon ni Mrs. Bertumen a nakaalerto dagiti Market Personnel a mangkita iti sistematiko ken naurnos a pannakaipatungpal dagiti polisa ti Tiendaan tapno mapagtalinaed ti napintas a serbisio kadagiti Marketgoers nangruna kadagiti aggapu iti sabali a lugar ken pagilian a bumisita iti Tiendaan.
Kabayatanna, impalagip ni Mrs. Bertumen kadagiti Food and Beverages Vendor iti masakupan ti Tiendaan ti panagsakadada iti Medical Requirements a kasapulan ti Sanitary Inspector iti pannaipabaro ti Lisensiada iti umay a Tawen 2014 kas iti X-ray Result ken dadduma pay a rekititos a kasapulan nga iyunay-unay ti Inspector idi ingannuatda ti inspection iti Tiendaan itay nabiit.
Dagitoy nga aksion ken inisiatiba ket mangkomplementar iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakaipaay iti umisu a serbisio para kadagiti umili ti Cabugao iti pakaseknan iti panaggatang ti pagbiag iti inaldaw. # (Web In-Action)
No comments:
Post a Comment