Cabugao, Ilocos Sur – Naangay ti Christmas Program 2013 ti Cabugao Federated Senior Citizens nga idauluan ni Mr. Bonifacio Somera, Presidente, idi Disiembre 9, 2013.
Sakbayna, nasapa a napan nakimisa iti Cabugao Catholic Church dagiti kameng sada nagtarus iti Senior Citizen’s Center, Brgy. Rizal. Cabugao, Ilocos Sur a nakaangayan ti programa ken selebrasion.
Nag-Welcome Talk ni Mr. Bonifacio Somera, Presidente. Inawisna ti amin a makipaset kadaytoy a panagselebrarda kas panangipasimudaag ti panagruknoy iti pannakaipasngay ti Mannubbot a mangisalakan.
Nangipaay met ti Mensahe ni MSWD Officer Mrs. Lydia S. Gazmen ket bininsana ti pateg ti panangipaay ti ayat, panagisagut ken pannakitimpuyog iti inaldaw kangrunaan iti panawen ti Paskua. Dinayawna pay ti tanipkel dagiti nataengan a makidanggay iti amin nga aktibidades nga igannuat ti Munisipio.
Nangipaay ti panagdaniw ni Mr. Orencio Sadioa, Presidente ti Cael-layan Senior Citizen Association ken panagkanta ni Mr. Jose Manantan iti Barangay Arnap kas Intermission Numbers-da.
Panagayat, panagkaykaysa ken panagsisinnagut ti kangrunaan a Tema ti Mensahe ni SBM Dr. Carlito S. Pano, OIC Municipal Mayor kadagiti naitallaong iti daytoy a selebrasion.
Nangipaay met ti Mensahe ni Retired Judge Efren S. Ubungen ket linagipna dagiti namaris a panawen ti pannakigamulona iti pagsayaatan ti kapatadanna ken ti ilina agingga iti agdama. Innayon ti Hues a napateg a lagipen ti pannakayanak ti Mesias a sarikedked ti Sangkataw-an.
Nakikaysa met da MSWD Assistant Leonora G. Reintar, OSCA Head Mr. Remigio B. Sunico ken dadduma pay a pannakabagi ti Munisipio.
Naisaganad ti pannakaaramid iti pay-ayam a nakagun-odan dagiti nangabak iti agkakapateg a premio. Naaramid pay ti Exchange Gift kadagiti nangted ti sagut a paki-raffleda. # (Web In-Action)
No comments:
Post a Comment