Cabugao, Ilocos Sur – Inggannuat ti Municipal Agriculture Office-Cabugao ti On-site Technical Briefing ti Hybrid Rice Derby Project para iti Wet Season Crop 2018 (Hunio-Nobiembre) kadagiti mannalon idi Mayo 23, 2018 ket naaramid ti panagtitipon idiay Sitio Callaguip, Barangay Baclig, Cabugao, Ilocos Sur.
Naaramid ti ababa a programa sakbay a nailawlawag ti pakabuklan ti proyekto a nagkammayyetan nga ipatungpal ti DA-RFO 1 ken iti LGU-Cabugao, Cabugao, Ilocos Sur. Nagatendar ni Assistant Provincial Agriculturist Marcelino A. Alibin ken ni Brgy. Captain Carlos V. Sison ti Barangay Baclig ken Participating Seed Companies.
Kalpasan iti nasayud a pannakailawlawag ti pakabuklan ti proyekto, naaramid ti panagsisinnukat ti kapanunotan dagiti naglektiur ken nagsaludsod a mannalon.
Kabayatanna, ipeksa dagiti mannalon ti panagyamanda iti LGU-Cabugao nga idauluan ni Mayor Josh Edward S. Cobangbang iti agtultuloy a pannakikammayetna kadagiti maseknan nga Ahensia kas iti DA a mangiwanwan kadagiti mannalon iti kabaruanan a wagas ti panagtalon.
Daytoy a pakauna nga addang ti naballigi a panagtalon (Technical Briefing) ket paset iti agtultuloy a programa ti Gobierno Munisipal nga idauluan ni Mayor Josh Edward S. Cobangbang a panangtulong kadagiti mannalon tapno maingato ti bilang ti apitda ken maiyagpang ti pannakaammoda iti dumurdur-as a teknolohia iti panagtalon a manggubuay ti panagsayaat ti kabibiag ti sapasap nga umili ti Cabugao. # (Web In-Action)
No comments:
Post a Comment