EMERGENCY SHELTER ASSISTANCE, INTED TI DSWD R01 GAPU ITI TYPHOON EGAY

Cabugao, Ilocos Sur – Inawat ti  179  a recipients  nga umili a nadadaelan ti pagtaenganda kadagiti kallabes a panagbagyona babaen iti panangited ti Department of Social Welfare and Development (DSWD) a naidalan iti  LGU-Cabugao idi Abril 7, 2016 iti Cabugao Conference Building, Cabugao, Ilocos Sur.

Buklen dagiti immawat dagiti maseknan ti totally-damaged (10 a katao)  ken  169 a bilang ti partially-damaged ti balayda. Sag-P10,000 ti inawat ti totally-damaged idinto ta P5,000 ti partially-damaged.

Nasangaili ti Munisipio dagiti Paying Team ti DSWD Regional Office 1 ken  tinulongan dagiti Staff ti MSWDO nga idauluan ni MSWD Officer Lydia S. Gazmen iti pannakaurnos  dagiti papeles dagiti nag-claim nga umili sakbay nga inawatda ti mabatayanda a gatad.

Sakbay a nairugi ti Pay-out ket kimmablaaw ken nagyaman ni Mrs. Gazmen.  Inlawlawagna ti pakabuklan ti Emergency Shelter Assistance (ESA)  ti DSWD Region 1  ket pagyamananna iti agtultuloy a panagtarabay ti LGU-Cabugao nga idauluan ni Mayor Edgardo “Ediboy” S. Cobangbang, Jr. kasta metten  kadagiti Opisiales ti DSWD ta adda daytoy a saranay kadagiti nadadaelan ti balayda iti naglabas a Bagyo Egay. 

Nagsarita ni Mayor Edgardo “Ediboy” S. Cobangbang, Jr. Kimmablaaw ken nagyaman iti daytoy a dimteng manen a tulong manipud  iti nasional a gobierno a naidalan iti rehion, probinsial ken munisipal a benneg. Innayon ni Mayor Ediboy a daytoy ti mangipakita a dagiti empleado, department heads ken naelektaran nga opisiales ti munisipio ket ammoda a tuntonen ti pundo a sumangpet para kadagiti kailianda nga aggatad ti P945,000 a direkta nga awaten dagiti benepisiario.

Insupusopna a daytoy a kabaelanda a mangpasangpet ti pundo ket maigapu iti napintas a kammayetda nga Opisiales ti Gobierno Lokal nangruna iti MSWDO nga idauluan ni MSWD Officer Mrs. Lydia S. Gazmen. 

Imbatad manen ti Ama ti ili iti mariknana a ragsak ta ammoda a tuntonen ti karbenganda a serbisio iti sidong dagiti maseknan nga Ahensia.

Iti pannakiuman ti Web In-Action kadagiti immawat ti tulong ket impeksada ti nalaus a panagyamanda iti Gobierno Munisipal nga idauluan ni Mayor Ediboy kasta metten iti DSWD ta makatulong a dakkel kadakuada daytoy nga inawatda a gatad. # (Web In-Action)