Cabugao, Ilocos Sur – Naaramid ti Grand Finals ti “Laing ti Talugading, Show Me, What You’ve Got”, programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. a maysa kadagiti naisangayan nga aktibidad a mangkulminar iti panagpiesta ti ili (Cabugao Ragsak Festival 2016) iti karabiyan ti Abril 21, 2016 babaen iti panagsasalip ti 12 a Contestants iti Cabugao Central Park (CCP).
 |
| CLICK HERE TO VIEW MORE PHOTOS |
Malaksid a pangpangayed iti panagpiesta ti ili ket panggepna pay iti mangtakuat/mangmuli kadagiti talento/kabaelan dagiti umili iti Cabugao, Ilocos Sur tapno pakairanudanda dagitoy. Nagduduma a Talento ti naiparang ken naisalip a kas iti panagkanta, panagsala, nausar ti string instrument, ken fire dance.
Naaramid ti Grand Finals iti CCP Stage a no sadino a ditoy ket nagbuyaan ti adu nga umili gapu iti napnuan a gagarda a mangammo iti kalalaingan kadagitoy a nagsasalip.
Iti Grand Finals ti “Laing ti Talugading”, nagpaay a Program Hosts da Ms. Michelle Sejalbo ken ni Mr. Dharen Jake R. Garcia ken buklen dagiti nagpaay a Hurado dagiti maresrespeto iti kabaelanda iti kastoy a tay-ak ti paglaingan nga indauluan ni Mr. Bruce Lee Paragas.
Inyalat ni Ms. Bea Sacramento (nagkanta) ti Barangay Bato, Cabugao, Ilocos Sur ti Kampeonato; maikadua a puesto ti Barlolong Brothers (string instrument) iti Barangay Sagayaden ken maikatlo a puesto ni Ms. Princess Pauline Tajardon (nagkanta) iti Barangay Rizal. Inawatda ti Premio ken Tropeoda babaen iti panangimatang dagiti nag-Hurado.
Indauluan ni Mayor Ediboy dagiti nangesponsor iti pasalip ken manipud kadagiti naayat nga indibidual ken grupo iti pribado a sektor. # (Web In-Action)
 |
| CLICK HERE TO VIEW MORE PHOTOS |
No comments:
Post a Comment