Cabugao, Ilocos Sur - Naaramid ti pannakai - Award ti 50 a Titulo babaen iti “Handog Titulo Program” kadagiti maseknan nga umili para iti programa ti libre a panagpatitulo ti daga (agriculture ken residential pre-patent) a pagtintinnulongan nga isayangkat ti DENR; CENRO; Register of Deeds (ROD) ken iti LGU-Cabugao.
Binayabay ni Municipal Assessor Lilia S. Flores agraman dagiti kameng ti Staff-na dagiti pannakabagi ti Register of Deeds (ROD)-Vigan City nga idauluan ni Mr. Louell Agdeppa kasta metten iti grupo da Mr. Francisco Arenas, CENRO Officer ken ni Ms. Janet Pascua, Chief, Technical Division ti PENRO-Ilocos Sur. Kangrunaan a nasangaili ni Mayor Josh Edward S. Cobangbang iti pannakaited dagiti Titulo kadagiti Benepisiario babaen iti ceremonial awarding a naaramid iti Early Childhood Care Development Building (ECCD) iti Abril 21, 2017 kalpasan ti Grand Parade iti umuna nga aldaw ti Piesta.
Maar-aramid daytoy a tinawen kabayatan iti umuna nga aldaw ti panagpiesta ti ili a Cabugao.
Sakbay a naiwaras dagiti Titulo, nagsarita dagiti Opisiales ti Register of Deeds (ROD); PENRO-DENR ken iti CENRO-Vigan City.
Inulitda ti pateg iti naan-anay a panagtagikua iti nabatayan a daga babaen iti libre a panangpatitulo. Daytoy a programa dagiti maseknan nga Ahensia ket agpatingga laengen agingga inton Tawen 2020.
Iti Mensahena, pinagyamanan ken binigbig ni Mayor Josh Edward S. Cobangbang dagiti pannakabagi ti ROD; CENRO ken iti DENR iti serbisio a maipapaay kadagiti kakailianna pakaseknan iti pannaka-Titulo dagiti dagada a residensial ken agrikultural babaen laeng iti bassit a magastosda.
Kabayatanna, pinagyamanan met dagiti umili nga immawat iti Titulo kadagiti Opisiales ti LGU Cabugao; ROD ken iti DENR iti naipaay kadakuada a pagsayaatan ken seguridad ti sanikua a nagun-odda babaen iti panangtarabay kadakuada iti Municipal Assessor’s Office nga idauluan ni Municipal Assessor Lilia S. Flores. # (Web In-Action)
No comments:
Post a Comment