Cabugao, Ilocos Sur – Naaramid ti pannakaiyallawat ti makina a Waterpump (KV 70 Diesel) with Accessories a nagun-od ti Asosasion ti Southern Salapasap Farmers Association (SSFA), Brgy. Salapasap, Cabugao, Ilocos Sur iti Departamento ti Agrikultura (DA)-Regional Field Office 1, San Fernando City, La Union. Naaramid ti turnover iti Abril 10, 2017 iti sango ti Cabugao Cultural and Sports Complex, Brgy. Rizal, Cabugao, Ilocos Sur.
Indauluan ni Mayor Josh Edward S. Cobangbang iti pannakai-turnover ti nadakamat a Waterpump (KV 70 Diesel) with accessories ken binayabay dagiti Opisiales dagiti mannalon nga immawat iti nadakamat a makina nga idauluan ni SSFA President Erwin R. Reintar.
Imbatad ni Mayor Josh Edward ti panggep ti LGU-Cabugao a mangnayon kadagiti maited a pagnam-ayan dagiti mannalon no
mapasingkedan a maparang-ayda ti Asosasionda ken mamantenerda dagiti maited kadakuada a pagnam-ayanda nga alikamen.
Segun ken ni Municipal Agriculturist Robert S. Savella, nagun-od ti nadakamat a ramit babaen iti naregta a panagkalikagum ti maseknan nga Asosasion ti mannalon ken iti panangilungalong ti LGU-Cabugao iti Departamento ti Agrikultura (DA)-Regional Field Office (RFO 1).
Innayon ni Mr. Savella a ti nadakamat a ramit ket napatgan babaen iti Grant.
Kabayatanna, impeksa dagiti dadaulo ti nadakamat nga asosasion nga immawat kadagitoy a makinaria iti panagyamanda iti Departamento ti Agrikultura (DA) iti panangawatdan iti kalikagumda kasta metten nga agyamanda iti agtultuloy a panangtarabay ti LGU-Cabugao iti pannakagun-od ti kalikagumda babaen iti panangidaulo ni Mayor Josh Edward S. Cobangbang.
Nabuangay ti Southern Salapasap Farmers Association idi Pebrero 2017 ken naaprobaran ti rehistrasionna iti Securities and Exchange Commission (SEC) idi Pebrero 21, 2017. Accredited daytoy nga Asosasion iti LGU-Cabugao ken addaan iti 33 a Miembros.
Dagiti Opisiales ti Asosasion (SSFA) iti agdama:
Presidente – Erwin R. Reintar
Bise Presidente – Deo Mata
Sekretario – Rommel Sapla
Tesorero – Melchor Reintar
Auditor – Felmar Quibilan
PRO – Alfredo Garcia.
Nakikaysa met dagiti DA-LGU Staff Members nga idauluan ni Municipal Agriculturist Robert S. Savella iti nadakamat a turnover. # (Web In-Action)
No comments:
Post a Comment