Tuesday, April 25, 2017

NIGHT FLOAT PARADE, NAPINTAS A NABUYA!

Cabugao, Ilocos Sur - Naaramid ti Night Float Parade iti Ragsak Cabugao Festival 2017  idi karabiyan ti Abril 24, 2017 (maikapat  nga rabii ti Piesta)  a nagpartisiparan dagiti Opisiales  ti  Local Government Unit (LGU)-Cabugao, Pamilia-LGU ken Opisiales ti 33 a barangay agraman dagiti kabarangayanda.

Immuna ti Parada   ti Police Mobile Patrol sa iti Float nga ayan ti  Imahen ni San Markos Ebanghelista a Patron ti ili a binayabay dagiti kameng ti Parish Pastoral Council iti Simbaan Romano Katolika.


Simmaruno dagiti Municipal Officials nga idauluan ni   Mayor Josh Edward  S. Cobangbang agraman dagiti Department/Section  Heads/dagiti Personnel ti LGU-Cabugao.

Nangrugi ti Parada iti Shell nga asideg ti NISTC Public Market, Cabugao, Ilocos Sur  ken nagpatingga idiay Cabugao Central Park (CCP) Auditorium, Barangay Bonifacio, Cabugao, Ilocos Sur.

Buklen ti Parada iti innem a Cluster Barangay ket agkakangayed dagiti Float a sinaruno dagiti nagparada a nakabuklan iti grupo ti 33 a barangay ti ili nga imatonan dagiti Kapitanes-da.

Kalpasan ti Parada, naaramid ti panagpabuya dagiti Players ti University of Luzon Drum & Bugle Corps iti Compound ti CCP ket reprep ti nagbuya.

Naisaganad ti Electrofire Dance iti entablado  ken iti Firedance iti ruar ti Auditorium  ket nanaynayonan manen iti adu a nagsangpet nga umili nga  agbuya iti CCP.

Kangrunaan a namagpikapik iti kanito ket iti napaut a Fireworks a a nasindian iti CCP Compound  ken  nagsaknap iti tangatang.

Naisaruno  ti Konsierto ti banda a nangparag-o kadagiti nagbuya ken iti panagkanta/panagpabuya  ni Filipino Singer Darren Espanto agraman dagiti kakaduana ket  naray-aw unay dagiti amin a nagbuya iti CCP Compound. # (Web In-Action)


No comments:

Post a Comment