Cabugao, Ilocos Sur – Naluktan ti 2019 Cabugao Inter-barangay Basketball/Volleyball Tournament idi Pebrero 16, 2019 ket umuna ti Parada a naaramid iti aglikmut ti Poblasion a nagpartisiparan dagiti Basketball/Volleyball Players iti nadumaduma a Barangay, Coaches, Game Officials ken Marching Band ti Sisim National High School ken Sisim Elementary School ken dadduma pay a pagadalan a nakipaset iti Parada ket nangrugi ken nagpatingga iti Cabugao Cultural and Sports Complex, Brgy. Rizal, Cabugao, Ilocos Sur a disso ti pagdidinnayoan.
Iti Opening Program, natokar ti Musika ti Pambansang Awit; Cabugao Hymn ken Ilocos Sur Hymn.
Simmaruno ti Opening Remarks ni Federated SK President Marc Russel Morales, Committee Chairman on Sports ti Sangguniang Bayan ket inawisna ti imatang dagiti umili a mangbuya kadaytoy a kangrunaan a parang/pagteng ti sports nga aramiden dagiti umaayam iti barangay.
Innayon ni SBM (Ex-Officio) Morales a daytoy a paay-ayam ti LGU-Cabugao ket panggepna nga ital-o ti bileg ken kalidad ti sports, napintas a panaglalangen, kooperasion, panangyadayo kadagiti agtutubo iti madi a bisio, panagkaykaysa a kangrunaan a timon iti agtultuloy a kinaragsak ken panagprogreso dagiti umili ti Cabugao.
Naisaganad ti panangited ni Mayor Josh Edward S. Cobangbang ti Mensahena kadagiti agsasalip.
Kimmablaaw ken nagyaman kadagiti agsasalip ken kasta metten kadagiti amin a naitaripnong iti Sports Complex.
Imbinsana ti pateg ti partisipasion dagiti agtutubo ket inggunamgunamna iti pannakamantener koma ti espiritu ti sportsmanship dagiti umaayam. “Play fair; honest; safe, Congratulations!” kuna ni Mayor Josh Edward.
Naisaruno a naibasa ti Oath of Sportsmanship babaen iti maysa a Basketball Player.
Insaruno ni Mr. Kevin Somera, Emcee, iti roll call ti Players/Team iti amin a barangay nga agpartisipar iti tournament.
Naaramid ti miting dagiti Coaches ken Referees para iti Game Rules babaen kadagiti Opisiales a mangimaton iti paay-ayam sakbay a napasamak ti Ceremonial Toss ti bola iti nagbaetan dagiti Basketball Player ti Brgy. Namruangan ken ti Brgy. Marga-ay nga umuna nga agay-ayam nga inimatangan dagiti Opisiales ti LGU-Cabugao ken Kakapitanes a naitaripnong ken kasta pay iti sapasap a nagbuya iti uneg ti Sports Complex.
Ni Mayor Josh Edward ti nangi-toast ti bola iti nagbaetan dagiti dua a Players ti agsalip a Team.
Nakikaysa met dagiti SK Chairmen/Kapitanes ti Barangay a naitallaong nga idauluan ni ABC President Thaddeus U. Soller kasta metten dagiti Municipal Officials nga isuda SBM Danny Q. Gazmen; SBM Dr. Jemaima S. Tan-Yee; SBM Atty. Randy Baniaga G. Kinaud; SBM Josefina S. Vallejo ken ni SBM Atty. Bryan Jett S. Pano. # (Web In-Action)
No comments:
Post a Comment