Friday, August 15, 2014

PRODUKSION TI BAWANG KEN LASONA, MAIPANGRUNA

Cabugao,, Ilocos Sur -  Naangay ti miting dagiti Opisiales/Kameng ti  Cabugao Vegetable Growers and Producers  Association ken iti Cabugao Onion and Garlic Association nga idauluan ni Mr. Armando Azcueta ken ni Mr. Henry B. Saliganan kas panagsaganadda iti Agosto 15, 2014 iti 2nd Floor, Municipal Building, Cabugao, Ilocos Sur.


Kangrunaan a naawis a nagsarita ket  ni Mr. Paul Jonathan “PJ”  L. Manalo, Manager ti Ilocos Multi-purpose Cooperative, Inc., Vigan City ket bininsana ti panagproduksion ken iti kasasaad ti industria ti bawang ken lasona iti lokalidad ken nairamanna pay a trinatar iti merkado dagitoy a cash crops nangruna iti pakaseknan iti  Export.

Naawis a nagatendar  ni Mayor Edgardo “Ediboy” S. Cobangbang, Jr. ket insalaysayna ti padasda a delegasion ti LGU-Cabugao a nagbisita iti pagilian ti India itay nabiit. Innayon ni Mayor Ediboy nga awan ti pangisukatanna iti gaget dagiti kailianna a  mannalon ken determinasionda nga agpatanor iti mula no maikomperar kadagiti naorserbaranna iti sabali a pagilian.


Dinakamatna iti panangikumit ti Kooperatiba nga idauluan ni Mr. Manalo a tumulong a mangparegta ti produksion ti bawang ken lasona ditoy nga ili agraman ti merkadona tapno agballigi iti panggep daytoy a rusat para kadagiti mannalon. Insupusop ti Ama ti Ili nga iti panangmantener dagiti Asosasion iti pannakikammayetda iti Financing Cooperative ket agtungpal nga awanton ti kasapulan nga intervention ti Gobierno ket makawayasdanton a mangtaming iti pagsaysayaatanda  nga agmulmula ti nateng ken cash crops. Imbatad ni Mayor Ediboy a mapasayaat ti dati a Bagsakan Center idiay NISTC Public Market a mausar a marketing area  dagiti agmulmula ti nateng, lasona ken bawang ditoy nga ili. Iti kasta, maingato ti purchasing power dagiti mannalon no ngumato ti matgedanda ket magatangda ti kayatda iti tiendaan a mangparegget ti negosio. Nupay kasta, aniaman a Taripa a makolekta  ti LGU iti Tiendaan ket agsubli met la kadagiti umili  babaen iti porma ti agduduma a serbisio, segun pay iti Alkalde Munisipal.

Naisaruno a naaramid ti Open Forum ket naballigi a natratar ken nasungbatan ni Mr. Manalo dagiti pakaseknan/singasing  dagiti mannalon. # (Web In-Action)

No comments:

Post a Comment