Sunday, August 17, 2014

MATH CLASS, UMUNA A SABADO TI SCHOOL YEAR 2014-2015

Cabugao, Ilocos Sur – Segun kadagiti Nagannak/Guardians a napan nagbantay idi Agosto 16, 2014  ket saan a panagtaktak ti panagsakripisioda a mangbantay ken mangtarabay kadagiti annakda iti maang-angay a Math Class iti tallo  a pageskuelaan ti Cabugao DepED District iti intero a Munisipalidad ti Cabugao ita a bulan ti Agosto 2014. Dagiti dua pay a pageskuelaan  kalaksidan  ti Cabugao North Central School a pannakasentro ti Math Class kadagiti pageskuelaan   ket iti Cabugao South Central School ken iti  Turod Elementary School, segun ken ni Mrs. Estrellita M. Siruno, Principal II, Cabugao North CS.


Iti pannakiuman ti Web In-Action idi Agosto 16, 2014, imbatad dagiti kaaduan a nagannak kadagiti napili nga ubbing a naanus a nagbantay iti ruar iti klase a maragragsakanda ta maipamaysa a masanay dagiti annakda iti Subject a Math ken manayonan ti panagtalek dagiti ubbing kadagiti bagbagida gapu ta adda pakaidumaanda a kabaelan iti kaaduan a kaeskuelaanda.

Kadagiti met ubbing a nairaman kadaytoy a panagsanay ket kayatda met a takuatan ti kabaelanda ken maibilang a parte ti pannakadisiplinada daytoy nga aktibidad nga iwayat ti DepED.

Innayon dagiti mangisursuro a nupay silulukat daytoy a pagenrolan dagiti interesado nga ubbing ken nagannak, maobserbaran  a kaaduan kadagiti nagenrol ken agdama nga agbasbasa ket pagduyosanda ti Matematika ken isuda ti kaaduan a nalaing iti klaseda iti pageskuelaanda nangruna iti Science Subject ken isuda ti kaaduan a maikonkontes iti sabali nga asignatura. # (Web In-Action)

No comments:

Post a Comment