Cabugao, Ilocos Sur – Maang-angay ti Sustainable Livelihood Program Data Gathering kadagiti kameng ti Pantawid Pamilyang Pilipino Program (4 P’s) iti immuna a lima a coastal barangay a naggapuan ti kliente ti 4 P’s iti ili a Cabugao, Ilocos Sur kas iti Barangay Sabang, Salomague, Dardarat, Daclapan ken ti Pug-os mangrugi iti bulan ti Agosto 2014.
Dumar-ay dagiti inna ken amma a mangibagi kadagiti pamilia a kameng ti 4 P’s iti mapagnunumuan a disso ken eskediul. Addan iti maika-5 a tawen ti umuna a bansada ti Conditional Cash Transfer Phase ti 4 P’s ket kalaksidan ti health care and education, masursuruan pay dagiti kameng a makigamulo iti komunidad kas iti pannakaited ti seedlings nga imulada, pannakasanayda nga ag-backyard gardening (para iti nutrition) ken kanaigna a napapateg nga aktibidades a mangnayon pay ti pagbiagan dagitoy a marigrigat a pamilia.
Madama ita a mapmapanda kadagitoy a barangay tapno ummongenda dagiti kameng ti 4 P’s ket aglektiur da Miss Aida S. Cueto, Municipal Link & Focal Person kasta metten ken ni Ms. Jessie Ann O. Tabut ken kakaduada iti Municipal Link Staff ti Municipal Operation’s Office (MOO) - 4 P’s Cabugao ket kasaritada dagiti kameng kadagiti gun-odenda a datos a kasapulan iti pannakaigannuat daytoy nga aktibidad.
Innayon ni Miss Cueto a kada bulan ket maysa a topiko wenno kangrunaan nga aspeto ti programa ti tamingenda kadagiti miembros ti 4 P’s tapno sistematiko ken naurnos ti pannakaipatungpal/panangagsepda ti pakabuklan ti programa.
Dagitoy nga aksion ken inisiatiba ket maigapu iti nasaknap a pannakaipakat ti programa ken iti pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti maseknan/tumulong nga Ahensia a kas iti DSWD, DOLE, TESDA ken dadduma pay nga Ahensia a katulonganda a mangipatungpal kadaytoy a programa. # (Web In-Action)
No comments:
Post a Comment