Cabugao, Ilocos Sur – Agtultuloy nga idauluan ti Grupo ti Clean and Green Program ti Munisipio nga imatonan ni MENRO-Designate Edgar S. Balangatan, AT, iti pannakadalus dagiti Parke, Plaza, Kalsada-Nasional, Processional Routes, Public Facilities iti Poblasion kas iti Cabugao Central Park, aglawlaw ti Munisipio, NISTC Public Market ken iti Food Court kasta metten iti pannakaitandudo ti Solid Waste Management Program kadagiti barangay ti ili ken iti Poblasion babaen iti LGU-Cabugao.
Inggunamgunam ti MENRO-Cabugao a kakokoordinarda dagiti Opisiales ti Barangay ken bumarangay nangruna iti asideg ti Poblasion nga aramidenda koma iti parteda iti panagdaldalus tapno makomplementaran ti ar-aramiden ti LGU ken dalusanda dagiti mabatoganda a paset dagiti Barangay Roads-da, Provincial Road, Processional Routes ken iti National Highway.
Kabayatanna, imbatad ni MENRO Edgar S. Balangatan a babaen iti regular a panagmonitor-da ket maar-aramid met ti regular coastal clean-up nga isayangkat dagiti nadumaduma a sektor kadagiti pito a barangay iti igid ti baybay.
Innayon ti MENRO a dagitoy ket mailungalong a kanayon tapno mamantener iti kinadalus ken kinapintas iti mabuybuya iti aglawlaw para iti mapasungadan a dadakkel a selebrasion ti ili: Semana Santa 2018; pannakarambak ti panagpiesta ti ili; panagsangaili kadagiti makipartisipar iti Palarong Pambansa 2018; ken ti panagsangpet dagiti Bakasionista ken Balikbayan ditoy ili ti Cabugao ita a summer months. # (Web Situational Report)
No comments:
Post a Comment