Cabugao, Ilocos Sur – Maang-angay ti dua nga aldaw a Cabugao District Sports Competition (Agosto 30-31, 2018) iti Cabugao Athletic Oval, Cabugao South Central School, Brgy. Bonifacio, Cabugao, Ilocos Sur.
Dagiti agsasalip ket dagiti napili nga atleta iti uppat a Zona iti naangay a Zone Meet iti kallabes manipud kadagiti pageskuelaan a nakabuklan dagiti sumaganad: Zone 1- dagiti pageskuelaan ti Pug-os, Reppa-ac, Nagsantaan, Salapasap, Bungro, Margaay ken ti Cabugao North CS; Zone 2- dagiti pageskuelaan ti Turod, Namruangan, Daclapan, Salomague, Dardarat ken Sabang; Zone 3- Cabugao South CS, Sagayaden, Pila, Nagsincaoan ken Lipit; Zone 4 – dagiti pageskuelaan ti Maradodon, Catucdaan, Sisim, Cael-layan, Cuantacla, Aragan, Arnap ken Carusipan.
Makiraman met dagiti pagadalan-sekundaria ti public ken private iti ili kas iti Cabugao Institute; Cabugao National High School (Turod); Pug-os National High School; Lipit National High School ken ti Sisim National High School.
Iti rugi ti paay-ayam, Agosto 30, 2018 ket naangay ti Parada iti aglikmut ti Poblasion a nagpartisiparan dagiti Atleta, Marching Bands, Officiating Officials, Coaches, School Heads ken PTA Officials.
Nagtungpal ti Parada iti sango ti Stage iti likud ti Cabugao South Central School ket ditoy a nairugi ti Programa.
Pakauna a sarita ti inted ni Mrs. Estrellita M. Siruno, Principal III, CSCS ket impeksana ti panagyamanda iti Gobierno Munisipal nga idauluan da Mayor Josh Edward S. Cobangbang iti agtultuloy a pannakausar dagiti pasilidad ti pagay-ayaman kasta metten iti agtultuloy a suporta ti LGU-Cabugao kadagiti aktibidad ti sports ken iti eskuela.
Nangipaay met ti Mensahe ni SBM (Ex-Officio) Member Hon. Marc Russel Morales, Committee Chair on Sports ket pinakiredna ti rikna dagiti Atleta nga uray aniaman ti resulta iti pannakisalipda ket parte daytoy iti panagsursuro. Maikagumaanan pay koma a ngumato iti magteng a pakisalipan dagiti dakkel ti potensialna babaen iti panangpasayaat ti kabaelanda iti sports.
Kalpasan ti intermission number ti CNCS Movers, nangipaay ti Mensahe ni Mayor Josh Edward S. Cobangbang ket kimmablaaw ken nagyaman iti pagsayaatan a maaramidan ti sports kadagiti ubbing ken agtutubo ken iti kinaregta dagiti mangisursuro ken nagannak a katulongan latta a manghulma iti panagtan-ay dagiti ubbing nga agbalin a naresponsable nga umili.
Pinadayawan ti Alkalde Munisipal iti partisipasion ti PTA ken dagiti School Heads iti pannakaibuangay daytoy a District Sports Competition. Impeksa ni Mayor Josh Edward iti ragsak ken panagyamanna iti napintas a panagtutunos iti kaaduan iti pannakaisagana ti Athletic Ground. Inggunamgunamna a mapagtalinaed koma latta iti sportsmanship kadagiti maaramid a paay-ayam ken agtultuloy koma iti pannakaipatungpal dagiti annuroten iti sports.
Naisaruno a naaramid ti Presentation of Athletic Delegation iti uppat a sona agraman iti sekundaria babaen kadagiti Presidente-da ken dadauloda.
Indauluan ni Charity Mae de la Cruz, RIAA Athlete (Gymnastics) a binalikas ti Athlete’s Oath a sinurot ti amin nga atleta.
Naisaganad iti pannakaisa ti District Athletic Flag babaen ken ni Mr. Ronel M. Ubaldo, District Athletic Manager ken District MAPEH Coordinator ken iti Raising of the Zone Delegation Flags babaen kadagiti Zone President kalpasanna.
Imbagian ni Mrs. Estrellita M. Siruno, Pricipal III ti CSCS ni Public Schools District Supervisor Dr. Consesa T. Rumias a nangideklara iti pormal a panaglukat ken panagrugi ti paay-ayam.
Nakipaset dagiti kameng ti Cabugao Rescue ken ti RHU Medical Team itoy a dua nga aldaw a paay-ayam ti Cabugao DepED District. # (Web In-Action)
No comments:
Post a Comment