Cabugao, Ilocos Sur – Nagmiting ti Hunta Direktiba nga idauluan ni Brgy. Captain Inocencio S. Sadac iti Nagbayruangan Communal Irrigation System, asosasion ti mannalon manipud iti nagkakammayet a Barangay ti Namruangan, Baclig, Daclapan ken Turod a masakupan ti National Irrigation Administration (NIA)-Communal Irrigation System (CIS) iti Cabugao, Ilocos Sur idi Hunio 3, 2012 iti Barangay Multipurpose Hall, Barangay Turod, Cabugao, Ilocos Sur.Kangrunaan a trinatarda ti panagkolektada iti Amortization a P1,300 a pagbayad ti mannalon iti kada ektaria iti pagpadanuman. Nag-Preside ni Brgy. Captain Sadac ket bininsana dagiti aktibidades a yusuatda sakbay a mairugi ti panagtalon iti Wet Season Crop 2012 (Hunio-Nobiembre). Dadduma a pakabuklan ti agenda ket iti panagdalus ti sibubukel a gimong iti kanal ken aripit inton Hunio 8, 2012 a pangisagana ti pannakaiserrek ti danum iti Intake ti Dam iti umay a panagtalon.
Iti pannakaiwayat ti panagsingir kadagiti di pay nakabayad a mannalon iti pagabangda, mapagmitingan ti dua a gimong ti kanal: Nagbayruangan ken Simabusa inton Hunio 10, 2012 idiay Intake Site tapno pagnanaminganda ti pannakadalus ken pannakaisimpa ti pannakapastrek ti danum iti Main Canal kadagiti conveyance canal nga usarenda nga agtalon.
Imbatad ni Kapitan Sadac a kalpasan ti miting, maammuan ken mapagtutulagan ti agsumbangir a gimong ti kanal pakaseknan dagiti maiyuman a mapatarimaan tapno sangsangkamaysada a mangidatag iti Opisina ti Provincial Irrigation Officer idiay NIA-Sta. Maria, Ilocos Sur tapno kiddawenda ti pannakatrabaho dagiti saan a kabaelan ti gimong nga obraen.
Ti Nagbayruangan CIS ket buklen ti 170 a kameng ti mannalon ken 120 ektarias a mataltalon iti Main Crop a masakupan ti uppat a barangay ti Cabugao. # (Web In-Action)
No comments:
Post a Comment