Cabugao, Ilocos Sur – Maysa a nasamay nga addang ti DA-LGU Cabugao ti panangtakuatna ti dadduma a wagas A pakatulongan ti mannalon iti pannakaingato ti apitda ken iti panangadaptar kadagiti teknikal a tulong dagiti pribado a kompania kas iti Syngenta Philippines, Inc. a makigamulo iti produksion ti pagay ditoy a deppaar.Umabot ti 100 a mannalon a naggapu iti 33 a barangays ti nagatendar ita nga umuna nga aldaw ti Hunio 2012 iti Cabugao Cultural and Sports Complex, Brgy. Rizal, Cabugao, Ilocos Sur tapno sisipenda ti adal-teknolohia nga imburay dagiti Teknisian ti nasao a kompania.
“Dagitoy a paseminar ket adda kabuyogna a pannakaipromot ti produktoda ngem mabawi ti pada a mannalon no surotenna ta agdoble met ti apitenna,” imbatad ni Mr. Fermin Sesuca, dati a Kapitan ken Presidente iti agdama iti Dardarat Farmer’s Association.
Nagtinnulong met da Municipal Rice Program Coordinator Nereo S. Daproza ken Federated Farmers President Elmer G. Bromeo a nangibagnos kadagiti mannalon a nakiinnadal kadagiti pannakabagi ti Syngenta.
Dinayaw ti pangulo ti grupo ti Syngenta, Mr. Christopher Ralleca, Demand Creation Leader, ti interes nga impakita dagiti nagatendar a mannalon a nagdengngeg ti baro nga adal ti panagpatan-ay ti pagay.
Ti Syngenta Philippines, Inc. ket napaneknekanen kadagiti demo-farm nga inyusuatda ti laing dagiti patanorda a bukel ti hybrid rice, insecticide, fungicide ken mollusksicide a a maidiaya kadagiti mannalon iti nainkalintegan a presio.
Mayannatup dagitoy iti panggep ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para iti naproduktibo a panagsukay ti talon a mangiragpat ti kasasaad dagiti mannalon babaen ti masapulanda iti nginatuan a bilang ti naapitda. # (Web In-Action)
No comments:
Post a Comment