Cabugao, Ilocos Sur – Kangrunaan nga agyaman iti pannakaaramid ti Slope Protection ti ampir ti kalsada nga asideg ti Karayan Cabugao iti Barangay Alinaay, Cabugao, Ilocos Sur ket dagiti agnaed iti asideg a barangay babaen iti panangidaulo ni Brgy. Captain Melanio Santella ti Barangay Alinaay.
Naipanawen ti pannakairingpas ti slope protection a sarikedked ti layus babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ti pannakapundo daytoy a proyekto manipud iti Congressional Fund ni Diputado Ryan Luis V. Singson, First District Ilocos Sur ken paset ti proyekto a ginastosan ti LGU-Cabugao.
Ti pannakatarimaan daytoy a paset ti kalsada nga asideg ti karayan ket mabenepisiaran a nangruna dagiti agdaldaliasat a lumugar iti kabangibang a barangay ti Brgy. Alinaay kas iti Brgys. Sisim, Catucdaan, Caellayan, Maradodon Aragan ken iti pay sapasap nga umili ti Cabugao. # (Web In-Action)
No comments:
Post a Comment