Cabugao, Ilocos Sur – Manmano nga agmintis iti pannakaitama ti apit iti 2nd Crop ti mula dagiti mannalon a pagay iti Turod Patac Farmer’s Association, Madula-Brgy. Turod Patac, Cabugao, Ilocos Sur.
Iti pannaki-amad ti Web In-Action idi Disiembre 10, 2013, imbatad ni Mr. Delfin Tagayuna a manmano nga agmintis ti taltalonenna a 3 ektarias (1.5 ektaria ti bukodna) ta malaksid a paboran ti tiempo ket nabuslon pay laeng ti danum a mausar nga aggapu iti puttotda iti baba ti Rangtay Alinaay ti Cabugao River nga usarenda a mangpatan-ay kadagiti mulada agingga iti bulan ti Pebrero a panagapitda.
Kabayatanna, makatulong unay dagiti irrigation canals a naaramid babaen iti panangipatungpal ti barangay nga idauluan ni Brgy. Captain Edgardo Celestino G. Sonido ti Brgy. Turod Patac iti kallabes ken timmulong ti Gobierno Lokal ti ili a Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr. iti pannakaaramid dagitoy a kanal a mamagkakamang kadagiti nalawa a sinilong iti nasao a disso ti pagtatalonan.
Manamnama a no maapitan daytoy a lokasion ti pagtatalonan ket mamulaanto manen ti sandia kalpasanna. # (Web In-Action)
No comments:
Post a Comment