Cabugao, Ilocos Sur – Naangay ti pannakaselebrar ti ipapatay ni Gat Andres Bonifacio, Bannuar a Filipino ken dadaulo ti Katipunero a nakidangadang kadagiti ganggannaet idi panawenna a naigiddan ti panagpiesta ti Barangay Bonifacio, Cabugao, Ilocos Sur kada Nobiembre 30.
Immuna a naaramid ti “Diana” iti parbangon iti dayta nga aldaw ket nagrikusda a nagtokar iti barangay ti grupo ti banda. Naisaganad ti “1st Fun Run” a nagpartisiparan dagiti nataengan, agtutubo ken ubbing babaen iti 3-5-8 kilometro a kawatiwat ti tinarayda a manipud iti Brgy. Hall ti Brgy. Bonifacio sada nagrikus iti Barangay Turod iti pangsublida iti Finish Line.
Kamalmanna, naangay ti nadumaduma a Parlor Games a nangpadaeg iti panagpiesta.
Karabiyanna, naangay ti pasala iti las-ud ti Covered Court ken iti Singing and Dancing Contest kalpasanna. Nakulminar ti Piesta babaen iti pannakaiyawat dagiti agkakapateg a premio kadagiti nangabak. Sangsangkamaysa met dagiti bumarangay, Opisiales-da ken agraman dagiti natatakneng nga agindeg a nangsarabo kadagiti nasangailida a kas kada Bokal Christian “Basi” Purisima, Bokal Constante Oandasan ken ni SB Member Vicky S. Serna ken agraman metten dagiti bumarangay nga agindeg iti daytoy a maysa kadagiti uppat a barangay a mangbukel ti Poblasion ti Cabugao, Ilocos Sur.
Ti Brgy. Bonifacio ket idauluan ni Brgy. Captain Valentin Somera Tuyor, Jr. iti agdama. # (Web In-Action)
No comments:
Post a Comment