Cabugao, Ilocos Sur – Iti pannakiuman ti Web In-Action idi Disiembre 6, 2013, imbatad ni Municipal Nursery Coordinator Robert S. Savella, AT nga iti “Love Tree” a mait-ited kadagiti apagkasar ti maiparparuar a seedling ta nayonanda ken patan-ayaenda ti nagyan ti Municipal Nursery sakbay manen a maikasada iti panagmula ti kayo iti umay a panagtutudo a bulbulan ti 2014.
Innayon ni Mr. Savella a papaaduenda ita ti agmasetas iti hybrid a papaya ken dadduma pay ti klasena a seedlings a mapatanor a maiwarasto kadagiti umili nga agnaed iti 33 a barangay kas pangkomplementar ti LGU-Cabugao iti programa ti Nutrision ken Salun-at.
Kabayatanna, impakaammo ni MENRO Edgar S. Balangatan, AT a monmonitorenda latta met dagiti naited a seedlings iti barangay nga agduduma ti klasena.
Babaen pay ti pannakaipakat ti pagannurotan iti opisinana iti pakaseknan ti nasayud a pannakaipatungpal ti Environmental Management Program ti LGU-Cabugao, masaludaran dagiti maimula a seedlings a dagitoy ket naited a pagsayaatan dagiti umili a rebbengna nga inda met taripatuen. # (Web In-Action)
No comments:
Post a Comment