Cabugao, Ilocos Sur – Naigannuat ti Farmer Technician led Farmers Field School on Sustainable Rice Production with Emphasis on Palay Check kadagiti mannalon ti Barangay Bato babaen iti panagbinnulig ti Department of Agriculture, Regional Field Office (DA-RFO 1), San Fernando City, La Union ken ti Local Government Unit (LGU)-Cabugao, Ilocos Sur iti panangidaulo ni Mayor Edgardo “Ediboy” S. Cobangbang, Jr.
Daytoy a Proyekto ti DA-LGU ket tarawidwidan dagiti Local Farmer Technician (LFT’s) nga isuda Mr. Henry B. Saliganan ken ni Mr. Bert P. Vicente ken agpapaay ni Mr. Obas Bill Y. Baclig, Supervising Technician.
Segun pay ken ni Acting Municipal Agriculturist Robert S. Savella, dagiti sumaganad ti panggep daytoy a programa a nangrugi idi Hunio 16, 2015:
1. Pananggun-od ti kabaelan iti panagpatanor ti pagay babaen iti aktual a kapadasan manipud iti panagbunubon agingga iti panagapit.
2. Panangadal ti amin nga aspeto iti panagtan-ay ti pagay tapno umadu ti maapit.
3. Panangbaliw ti kadaanan a wagas ti panagmula ti pagay ket aramiden ti kabaruanan a takuat a mangingato ti matgedan.
4. Mangipasigurado ti 15% a ngatuan ti apit kada panagtalon ken 5% ti tinawen.
5. Panangpapigsa ti gimong ti mannalon ken panangnayon ti kabaelanda nga agmanehar iti naimulada a pagay.
Buklen ti panagadalda iti 16 a lawas manipud iti panagbunubonda.
Iti biang ni Acting Municipal Agriculturist Robert Savella ti DA-LGU, pinaregtana dagiti mannalon ti Barangay Bato nga ikagumaanan dagiti recipients nga adalen ti maited a baro a teknolohia ti panagtalon ket iyallatiwdanto iti padada nga agtaltalon para iti sapasap a pagririnnanudan.
Pinagyamanan pay ni Mr. Savella ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ti DA-RFO 1 nga idauluan ni Regional Executive Director Valentin C. Perdido, Ph. D., ta maikkanda iti kastoy nga adal a mangiyintek iti napintas a pagbanagan iti mulada a pagay. # (Web In-Action)
No comments:
Post a Comment