Cabugao, Ilocos Sur – Kalpasan ti Flag Ceremony iti Pamilia LGU-Cabugao iti Agosto 3 , 2015 iti sango ti Municipal Hall, imbasa ni Mr. Dario Roy Siruno, Municipal Information and Tourism Officer dagiti Certificate a nagun-od ti Municipal Disaster Risk Reduction Management Council (MDRRMC)-Cabugao a napagballigianda nga inyalat iti kalkalpas a 1st Governor Ryan Singson Rescuelympic a naangay idi Hulio 29-31, 2015 iti Quirino Stadium, Bantay, Ilocos Sur a nagpartisiparan ti 27 a Munisipalidad iti Probinsia ti Ilocos Sur.
Malaksid kadagiti sertipiko a naited, karaman pay ti Tseke nga aggatad iti P75,000 ken Plake ti inabak ti MDRRMC-Cabugao nga immuna a nai-award idiay Vigan City babaen kada Gov. Ryan Luis V. Singson, PDRRMC Chairperson ken ni Mr. Michael C. Chan, PDRRMC Officer kadagiti kameng ti MDRRMC-Cabugao.
Inimatangan ni Mayor Edgardo “Ediboy” S. Cobangbang, Jr. iti pannakai-award ditoy Munisipio dagiti nasao a Certificate ti Pammadayaw, Tseke ken Plake babaen iti panangbayabay kenkuana da SBM Danny Q. Gazmen; SBM Dr. Jemaima S. Tan-Yee; SBM Vicky S. Serna; SBM Jayhan Alcid-Tan; SBM Benedicto M. Savellano; SBM Josefina S. Vallejo ken ni SBM Atty. Bryan Jett S. Pano.
Iti panagsarita ni Mayor Ediboy, kimmablaaw ken pinagyamananna daytoy a nagun-od a pammadayaw iti MDRRMC-Cabugao babaen iti panangtarabay ti LGU-Cabugao..
Impeksa ti Ama ti Ili iti ragsakna kadaytoy a nagapuanan ti MDRRMC-Cabugao ket mangnamnama iti agtultuloy a panangitakderda iti kaipapanan daytoy a pannakabigbig a pakaidumaan ti ili a Cabugao iti sabsabali nga ili ti Probinsia.
Nagsarita met ni Engr. Nestor B. Somera, MDRRMC Officer ken dadaulo dgiti nakisalip ket bininsana ti kapabilidad ti grupona a nakibalubal kadagiti napagsasalipan ken kinasalipna. Pinagyamananna ti agtultuloy a suporta ti LGU-Cabugao babaen iti panangidaulo ni Mayor Ediboy iti partisipasion ken dagiti aktibidadda ti MDRRMC-Cabugao ditoy Munisipalidad ken iti Probinsia.
Naragsak pay a nangipadamag ni Mayor Ediboy kadagiti napipintas a pagkunaan dagiti kailian nga umili ti Cabugao a nakalanglangenna iti sabali a pagilian kadagiti progreso ken pagdur-asan ti ili a nakitada babaen pay iti Website. Innayon ti Ama ti Ili a dagiti maaw-awatna a pammadayaw ken panangapresiar ket iramanna a mapadayawan ti sapasap nga umili agsipud ta kolektibo dagitoy a gapuanan ken nagun-od segun kenkuana.
Naisaganad ti pannakaibasa dagiti nagan dagiti agkasangay iti bulan ti Agosto 2015 nga idauluan met laeng ni Mayor Ediboy nga agkasangay inton Agosto 18 ket kinantaan ida ti Pamilia-LGU ken binagi ni Mrs. Lydia S. Gazmen, maysa kadagiti agkasangay iti nangipeksa iti panagyaman ken nangipaay iti mensahena kadagiti kakaduana ken iti sapasap.
Naaramid pay ti padamag dagiti aktibidad iti dadduma a Departamento ti LGU ken iti SB ken aktibidad a maasikaso nga atendaran ti Pamilia-LGU daytoy umuna a lawas ti Agosto 2015. # (Web In-Action)
No comments:
Post a Comment