Cabugao, Ilocos Sur – Manmano ti insidente ti Malnutrision ti ili ti Cabugao, Ilocos Sur kas ipalnaad ti bassit a bilang ti ubbing a maipapaagas a nakurang ti sustansia ti bagi ken salun-atda iti RHU.
Imbatad ni Dr. Bernardino P. De Gracia, Medical Officer III ken Municipal Health Officer nga uray agkurang ken agsurok ti timbang ti ubing ket makuna latta a “malnourished” dagitoy.
Nupay kasta, dinayaw ni Dr. De Gracia iti napintas a koordinasion dagiti pannakabagi ti Ahensia, Opisina ken Programa ti Munisipio pakaseknan iti Nutrision ta katulongan ida iti pannakatagiben ti salun-at dagiti agnanaed iti barangay tapno mapapigsa ti resistansia dagiti ubbing kadagiti tumaud a saksakit.
Innayon ni Dr. De Gracia a kalikaguman ti sapasap a mamantener daytoy a programa kadagiti barangay tapno pumigsa ti pundasion ti salun-at dagiti agtan-ay nga ubbing para iti masanguanan a kasasaadda nangruna iti panagadalda.
Iti sabali a bangir, maiwaywayat latta ti pannakaasikaso dagiti underweight children kadagiti barangay babaen kadagiti BNS ken BHW’s. Mainayon a pagrebbenganda ti mangsursuro kadagiti inna iti umisu a panangtaripato kadagiti ubbing ken iti agtultuloy a panagmulmulada koma ti nateng iti arubayanda tapno adda pagalaan ti mainayon a nasustansia a pagtaraonda kadagiti ubbing.
Kabayatanna, mainayon a pagsayaatan dagiti ubbing iti ipatpatungpal ti MSWDO iti barangay babaen iti Supplemental Feeding Program ti Day Care Center iti bulan ti Agosto 2015. # (Web Situational Report)
No comments:
Post a Comment