Cabugao, Ilocos Sur – Nangaramid dagiti 740 a Delegado iti aktibidad a pakalaglagipan iti panagtarusda ditoy Ili a Cabugao, Ilocos Sur babaen iti panagmulada iti 1,000 a mangrove seedlings iti aplaya ti Brgy. Sabang, Cabugao, Ilocos Sur idi Abril 11, 2018.
Buklen dagitoy dagiti Opisiales ti DepED iti Delegado ti Region 2 ken indauluanda iti nadakamat a Mangrove Planting ken binayabay dagiti pannakabagi ti LGU-Cabugao nga imatonan ni MENRO-Designate Edgar S. Balangatan, AT.
Dagiti Delegado ket isuda ti nangbukel iti Cagayan Valley Regional Athletic Associon (CAVRAA) a naggapu iti siam nga Schools Division Offices (SDOs) ti Rehion Uno a kas iti SDO Batanes; SDO Cagayan: SDO Tuguegarao City; SDO Isabela; SDO Ilagan City; SDO Cauayan City; SDO Santiago City; SDO Quirino; ken SDO Nueva Vizcaya ket naipaay a Billeting Quarters-da dagiti Pasdek ken Pasilidad ti Cabugao South Central School, Bry. Bonifacio, Cabugao, Ilocos Sur; Cabugao North Central School, Brgy. Rizal, Cabugao, Ilocos Sur ken iti Cabugao Institute, Barangay Bonifacio, Cabugao, Ilocos Sur.
Sakbayna, dimteng ti Delegasion ti Region 2 idi Abril 7, 2018 ditoy ili ti Cabugao ket naituding iti panagsanayda sakbayna iti para iti kompetision ti Palarong Pambansa 2018 inton Abril 15-21, 2018 a maangay idiay Quirino Stadium, Bantay, Ilocos Sur. Buklen dagiti Altleta iti Elementaria ken Sekundaria agraman iti Junior ken Senior High Schools (Grade 11 ken Grade 12) iti benneg iti pageskuelaan kadagiti nadakamat a Probinsia ken SDOs.
Indauluan da Mayor Josh Edward S. Cobangbang ken ni ABC President Thaddeus U. Soller dagiti Opisiales ti Ili a nangpasangbay kadagiti nadakamat a Delegado. # (Web In-Action)
No comments:
Post a Comment