UPDATE TI “NO-PLASTIC BAG DAY” ITI ALDAW TI LUNES

Cabugao, Ilocos Sur - Agmakatawenen iti pannakaipatungpal ti paglintegan iti Munisipio ita  a Hunio 2018 ket nakiddaw iti kapanunotan ni MENRO-Designate Edgar S. Balangatan maipapan iti “pilot implementation” ti “No Plastic Bag Day” nangruna iti Tiendaan iti NISTC Public Market ken dagiti pageskuelaan ti sekundaria iti ili.

Imbatad ni Mr. Balangatan iti a napintas met iti resultana ken pannakikooperar met dagiti maseknan a masakupan ti ordinansa ket suhestionna nga uray koma no inaldawen a maaramid wenno maipatungpal daytoy a paglintegan tapno matingiting pay iti ad-adu pay a nasayaat a pagbambanagan daytoy a linteg. 

Maipalagip a naaramid ti Launching ti “No-Plastic Bag Day”  idi Hunio 27, 2017.

Daytoy a linteg ket  inesponsoran ni SBM  Dr. Jemaima S. Tan-Yee iti Sangguniang Bayan ti ili a Cabugao, Ilocos Sur.

Iti launching ti nadakamat nga Ordinansa, imbasa idi ni SBM Tan-Yee iti pakabuklan ti Ordinansa iti imatang ti Pamilia-LGU nga idauluan ni Mayor Josh Edward S. Cobangbang; dagiti nagatendar a Konsehales ti Ili, kasta metten kadagiti School Heads ti Cabugao DepED District ken dadaulo iti Northern Ilocos Sur Trade Center (NISTC); Public ken Private High Schools a dagitoy iti kangrunaan a pakaisentruan iti makatawen a Pilot Implementation iti nadakamat nga Ordinansa.

Dagiti kangrunaan a panggep daytoy nga ordinansa ket dagiti sumaganad:

1. Regulasyon iti panagusar ti plastic bags/cellophane (Polyethylene) ken Styropor/Styrofoam (Polystyrene (PS)) a pagbungon ken mausar a bagging materials.
2. Panangiparuam iti panagusar iti biodegradable containers a kas iti woven bags (bayong);  cloth bags (katsa); paper bags ken dagiti kapadana a materiales a mangsukat iti  plastic bags/cellophane (Polyethylene) ken Styropor/Styrofoam (polystyrene (PS)) a pagbungon/pagikargaan  ken bagging materials.
3. Mangipromot  ken mangprotehir iti salun-at,  seguridad ken pagsayaatan iti sapasap.
Kanaig daytoy, maideklara iti kada aldaw ti Lunes ti lawas a “NO PLASTIC BAG DAY”. 
Saklaw pay daytoy nga Ordinansa ti nabukel a  Task Force nga idauluan ti Punong Barangay, dagiti maseknan a Komite iti Konseho ti Barangay; Solid Waste Management Board ti Munisipio; Municipal Health Office ken iti Municipal Environment and Natural Resources Office (MENRO) tapno agtitinnulongda a mangiwaragawag iti pakabuklan daytoy nga ordinansa iti publiko.

Madutokan met  dagiti Barangay Officials ken Barangay Tanod kasta metten  dagiti kameng ti  Kapolisan iti naan-anay a pannakaipatungpal daytoy a linteg. # (Web In-Action)