Cabugao, Ilocos Sur – Naangay ti panagsapata dagiti naelektaran a Barangay Officials/Sangguniang Kabataan Officials iti 33 a Barangay ti ili a Cabugao, Ilocos Sur idi Hunio 26, 2018 iti Cabugao Cultural and Sports Complex, Brgy. Rizal, Cabugao, Ilocos Sur. Agtakem dagiti nagsapata nga Opisiales iti Tawen 2018-2020.
Immuna a naaramid ti Nasantuan a Misa iti Cabugao Catholic Church a nagatendaran dagiti Opisiales ti Barangay ken SK Officials sa naaramid ti seremonia ti panagsapata iti Cabugao Cultural and Sports Complex.
Iti panaglukat ti Seremonia, indauluan ni Mrs. Rosario Corazon S. Abara, Municipal Civil Registrar iti Kararag. Nakanta ti Philippine National Anthem; simmaruno ti Ilocos Sur Hymn ken iti Cabugao Hymn babaen ken ni Mr. Kevin S. Somera, Conducting.
Panglukat a sarita ti inakem ni Ms. Honey Lou C. Baguso, OIC MLG Officer ti ili a Cabugao, Ilocos Sur.
Naisaruno ti panangipresentar ni Mrs. Josefa R. Pimentel, COMELEC Election Officer ti ili a Cabugao, Ilocos Sur kadagiti nagballigi a Kandidato iti biang ti Sangguniang Barangay ken iti Sangguniang Kabataan iti tunggal barangay ti Munisipalidad ti Cabugao iti napalabas a May 14 Barangay and SK Elections.
Pinagsapata ida ni Governor Ryan Luis V. Singson, naisangayan a sangaili iti nadakamat a seremonia. Kinaritna dagiti nagsapata nga Opisiales ti panagtrabahoda a dagus tapno pumardas pay ti panagprogreso ti ili a Cabugao. Kiniddawna iti kooperasion ken tinnulong iti pannakaipatungpal dagiti programa ken proyekto ti Gobierno Probinsial iti benneg ti salun-at; edukasion; ken iti impraestruktura. Inyunay-unayna a saan la koma nga iti sports ti pagtalimudokan ti atension dagiti agtutubo a lideres ti SK no di pay ket iti pannakaprotektar iti aglawlaw ket gapu ta isuda ti sumarsaruno a lideres iti masakbayan ket dakkel iti ekspektasionna a magun-od amin dagitoy a sibaballigi. “ Congratulations manen!” kuna ni Governor Ryan.
Naisaruno met iti panangipaay ti Mensahena ni Mayor Josh Edward S. Cobangbang. Kimmablaaw ken nagyaman iti amin a timmabuno iti nadakamat a seremonia ti panagsapata dagiti nabutosan nga opisiales ti Barangay ken SK ditoy ili ti Cabugao.
Impaganetget ni Mayor Josh Edward kadagiti nagsapata iti panangsaluadda kadagiti nakaiwes kadakuada a pagrebbengan tapno magun-od iti “genuine public service”. Innayonna a katinnulongda ti LGU ken iti Gobierno Probinsial a mangresolbar kadagiti pakaseknan iti panagipatungpalda iti pagrebbengan ken serbisioda kadagiti kalugaranda ken kailianda tapno maragpat ti naparpardas a panagprogreso ti ili. “Congratulations kadakayo amin a nagsapata. God Bless!” kuna ni Mayor Josh Edward.
Nagatendar met dagiti kameng ti Sangguniang Bayan ti ili agraman ni Vice Mayor DJ Savellano kasta metten dagiti adda iti Media.
Kalpasan ti Picture Taking, naaramid ti panangsangoda kadagiti naisagana a taraon para iti nadakamat a Seremonia. # (Web In-Action)
No comments:
Post a Comment