Cabugao, llocos Sur – Umuna a naaramid ti Distribusion ti Fertilizers kadagiti ID Card Holder a mannalon ti Brgy. Cuancabal; Brgy. Bonifacio; Brgy. Turod Patac ken ti Brgy. Baclig, Cabugao, Ilocos Sur idi Hulio 23, 2018 babaen iti programa ti LGU-Cabugao a pannakaited kadagiti mannalon iti libre a ganagan a mausarda ita a Wet Season 2018 (Hunio-Nobiembre). Naaramid ti panagwaras ti ganagan kadagiti Barangay Hall ken Covered Court dagiti nadakamat a barangay.
Kasapulan nga ID Card Holder ti mannalon a makaawat iti sag-dudua a ganagan (1 bag a 16-20-0 ken 1 bag a 46-0-0 kasta metten iti 3 sachets a Humus Plus).
Dagitoy a ganagan ket naisangrat nga usaren dagiti mannalon iti panagtatalon iti Wet Season 2018 (Hunio-Nobiember) ken naggapu iti pundona iti Local Government Unit ti ili a Cabugao nga idauluan ni Mayor Josh Edward S. Cobangbang.
Nangipaay met ti Mensahe ni Mayor Josh Edward kadagiti mannalon. Binigbigna ti akem dagiti mannalon a katinnulong ti Gobierno Lokal a mangpasayaat iti ekonomia ken kinatalingengen iti kasasaad ti pagtaraon ti sapasap ket kaikarianda met iti makomplementaran kadagitoy a naindaklan a pagrebbenganda iti kagimongan.
Bimmayabay ken ni Mayor Josh Edward da SBM Danny Q Gazmen; SBM Vicky S. Serna; SBM Josefina S. Vallejo; SBM Atty. Randy Baniaga G. Kinaud; SK Federated President Marc Russel Morales ken ni Municipal Agriculturist Robert S. Savella.
Nakipaset met iti nadakamat nga aktibidad dagiti Opisiales ti Barangay; Farmers Association ken dagiti Staff ken Personnel ti Municipal Agriculture Office kadagitoy a nadakamat nga eskediul.
Kabayatanna, impeksa dagiti immawat a mannalon ken dagiti timmarabay kadakuada nga Opisiales iti panagyamanda iti LGU-Cabugao nga idauluan ni Mayor Josh Edward S. Cobangbang kadaytoy a tulong a naited iti Sektor-Agrikultura. # (Web In-Action)
No comments:
Post a Comment