NAPNUAN iti ragsak ken panagyaman iti Dios dagiti Katoliko iti Diosesis ti Laoag, Ilocos Norte, ken kabangibangna nga arkidiosesis ken diosesis iti pannakaisayangkat ti pontifical coronation ti imahe ni Apo Santa Maria de Nuestra Señora La Virgen Milagrosa Causa de la Alegria sadiay simbaan ti Parokia ni San Juan Bautista, Badoc, Ilocos Norte idi bigat ti Mayo 31, 2018.
Rinibu a Katoliko dagiti naglilinnetlet iti simbaan ken iti arubayanna a nangsaksi iti nangayed a koronasion kabayatan ti Nasantuan a Misa nga indauluan da Manila Archbishop Luis Antonio Cardinal Tagle, Cotabato Archbishop Orlando Cardinal Quevedo, Laoag Bishop Renato Mayugba, Nueva Segovia Archbishop Marlo Peralta, ken dadduma pay nga obispo iti Pilipinas. Nakipagrambak dagiti adu a padi manipud iti Diosesis ti Laoag, Arkidiosesis ti Nueva Segovia ken dadduma pay a diosesis; ken dagiti adu a relihiosa ken laygo. Indauluan met ni Governor Imee Marcos dagiti opisial ti lokal a gobierno iti Ilocos Norte a nakikaysa iti Misa.
Inrepresentar ni Cardinal Tagle ni Papa Francisco iti panangkoronana iti imahe ni La Virgen Milagrosa, ken binayabay da Cardinal Quevedo ken Bishop Mayugba.
Iti homilia ni Cardinal Quevedo, tubo ti Ilocos Norte ken sigud nga Arsobispo ti Nueva Segovia, linagipna ti pakasaritaan ti pannakaidaknir sadiay kabaybayan iti Sitio Dadalaquiten, Barangay Lugo, iti nagbedngan ti Sinait, Ilocos Sur ken Badoc, Ilocos Norte idi 1620 iti kahon a nakaipalaonan ti imahe ni Santo Cristo Milagroso a nagbaklay iti krus, ken ti imahe ni Virgen Milagrosa nga ubbana ni maladaga a Jesus.
Impaganetget ni Cardinal Quevedo a dagiti sagrado nga imahe ket mapapati nga impayanud iti baybay dagiti maidaddadanes a Kristiano sadiay Japan tapno malisianda ti pannakapastidiar ken tapno saan a madadael dagiti imahen. Sinalaysayna nga innem a tawen sakbay ti pannakasarak dagiti imahen da Santo Cristo Milagroso ken Virgen Milagrosa ket nangrugin sadiay Japan ti nakaro a pannakaidadanes dagiti Kristiano.
Impalagip ni Cardinal Quevedo dagiti Kristiano a martir a napapatay ken naparparigat gapu iti pammatida. Linagipna ti umuna a Pilipino a santo a ni San Lorenzo Ruiz ken ni Beato Justo Takayama Ukon, maysa kadagiti samurai warriors a napapanaw sadiay Japan ken nagpaing iti Manila. Impalagipna nga idi panawen ti Tokugawa Shogunate iti las-ud ti nasurok nga uppat a siglo ket naidaddanes dagiti Kristiano ngem adu kadakuada dagiti nagtalinaed a natibker iti pammatida ket nagbalinda a nalimed a Katoliko agingga idi mapalubosanda manen a mangipaduyakyak iti pammatida idi 1873 kabayatan ti Meiji Government.
Linagipna nga idi 2015 kabayatan ti pannakarambak ti maika-150 nga anibersario ti pannakadiskobre kadagiti nalimed a Kristiano Katoliko iti Japan, imbaon ni Papa Francisco a nangirepresentar iti Santo Papa. Sinalaysayna a ti kangrunaan a pammaneknek dagiti nalimed a Hapon a Kristiano Katoliko ket ti panangbigbig ken panagraemda ken ni Santa Maria nga Ina ni Jesucristo, ket kinaritna ida ti agtultuloy a panangisaknapda iti natibker a pammatida. Inawisna met dagiti Katoliko iti Kailokuan ti panangpaunegda ti pammatida iti Dios ken panangsurotda iti pammatulad ni Jesucristo ken Santa Maria.
Iti paggibusan ti Misa, impeksa ni Bishop Mayugba ti panagyamanna iti Dios ken Santa Maria ken amin a nakikaysa iti naindaklan a pasken. Impaganetgetna nga iti pannakakorona ni La Virgen Milagrosa ket maaddaan laeng iti nauneg a kaipapanan babaen ti panangtulong kadagiti napanglaw ken maipapaigid a tattao. Inkurakna ti pannakabukel ti Caritas Badoc a mangtulong kadagiti napanglaw, katutubo a tattao ken komunidad iti Ilocos Norte.
Iti pannakakorona ti imahe ni La Virgen Milagrosa iti Badoc, babaen ti dekreto nga impaulog ni Santo Papa Francisco ket naital-on daytoy kas patron ti Ilocos Norte, a mangguyugoy kadagiti adu a Katoliko a deboto, kas ti kaadu dagiti deboto a mapmapan sumarsarungkar iti imahe ni Santo Cristo Milagroso iti simbaan ti Parokia ni San Nicolas de Tolentino iti Sinait, Ilocos Sur, a kaabay ti Badoc, Ilocos Norte.
Dagiti dua nga imahe a naalaw dagiti mangngalap iti kabaybayan ti nagbedgan dagiti dua nga ili idi 1620 nga agpada a sakup ti maymaysa a probinsia nga Ylocos ket ipalagipna dagiti adu a karit ken pannubok a naglasatan ti Kristiano – Katoliko a pammati sadiay Japan a naggappuanda.
Immuna a simmangpet dagiti Kristiano a misionario pakairamanan ti Jesuita a ni Francisco Javier sadiay Japan idi 1540, ken nadaras ti panagadu dagiti nabuniagan a Katoliko a sigud a Budismo wenno Shintoismo ti relihionda sadiay Kyushu. Idi nabiit pay dagiti misionario, sinuportaran ti Shogunate ken imperial a gobierno ti Catholic mission iti pammatida a makessayan ti bileg dagiti monghe a Budista, ken tapno mapabileg ti komersio iti baet ti Japan, Spain ken Portugal.
Idi agangay, nagdanag ti Shogunate iti dakes a parnuayen ti kolonialismo, kas ti inaramid dagiti Kastila iti panangsakupda iti Pilipinas kalpasan a kaaduan nga agindeg ket nagbalin a Katoliko.
Nangiyetnag ni Emperador Ogimachi iti pammilin a mangipawil iti Katolisismo idi 1565 ken 1568, ngem nakapsut ti epektona. Manipud idi 1587, impawil ni Toyotomi Hideyoshi dagiti Jesuita a misionario, ket naibilang ti Kristianismo a mangdadael iti nailian a panagkaykaysa dagiti Hapon.
Impawil a namimpinsan ti Tokugawa Legasu Shogunate ti Kristianismo iti Japan idi 1620, ket nagsardengen a nagparang iti publiko. Adu a Katoliko dagiti naglemmeng. Nagparangda manen iti publiko kabayatan ti Meiji Government idi 1873.
Kabayatan ti nasurok a 250 a tawen a pannakaipawil ti Krisitianismo sadiay Japan, adu dagiti nagbalin a martir ti pammati nga indeklaran dagiti nagbalin a Santo Papa kas santo ken santa ti Simbaan Katolika. Mairaman kadakuada dagiti Kristiano a misionario ken pasurotda a naidadanes ken nabitay gapu ti panagbalinda a napudno ken ni Apo Jesus, ngem iti turay wenno shogunate.
Adda dagiti 26 a martir sadiay Nagasaki a nabitay babaen ti pannakaibitinda iti krus idi Pebrero 5, 1597. Napagbalinda a beato idi Setiembre 14, 1627 babaen ken ni Papa Urbano VIII, ken napagbalinda a santo idi Hunio 8, 1862 babaen ken ni Papa Pio IX.
Iti pannakaitultuloy ti pannakaidadanes dagiti Kristiano idi 1598 – 1632, agdagup iti 205 a misionario ken katutubo a Kristiano dagiti nabitay gapu iti pammatida. Napagbalinda a venerated idi Pebrero 26, 1866, ken napagbalinda beato idi May 7, 1867 babaen ken ni Papa Pio IX.
Dua a Kastila a misionario manipud Manila dagiti simmangpet sadiay Japan idi 1632 dagiti naaresto idi Nobiembre, ket idi Disiembre 11, 1632, nabitayda gapu iti pammatida. Napagbalinda a venerated idi Nobiembre 28, 1988, ken beato idi Abril 23 1989, babaen ken ni Papa Juan Pablo II.
Napapatay dagiti 16 a martir iti baet ti 1633 – 1637. Naggapu dagitoy a misionario iti Pilipinas. Napagbalinda a beato idi Pebrero 18, 1981, ken santo idi Oktobre 18, 1987 babaen ken ni Papa Juan Pablo.
Sabali pay ti grupo dagiti 188 a martir iti nagbaetan ti 1603 – 1639. Dagitoy dagiti padi ken laygo a napapatay gapu iti pammatida. Napagbalinda a venerated idi Hunio 1 2007, ken beato idi Nobiembre 24, 2008, babaen ken ni Papa Benito XVI. # Source - Eden A. Alviar/TAWIDNEWS
No comments:
Post a Comment