Cabugao, Ilocos Sur – Inawat dagiti agtutubo nga immuna a nagtrabaho iti Special Program for the Employment of Students (SPES) a nagbuligan ti Department of Labor and Employment (DOLE)-Vigan City ken ti LGU-Cabugao kadagiti agad-adal itay bakasion 2019.
Inawat ti First Batch (23 nga agad-adal) ti gatad a kaibatogan ti bayad ti serbisioda manipud iti HRM Office nga imatonan ni Miss Teresita Maximina “Mimi” S. Sison ken iti panangaprobar ni Mayor Josh Edward S. Cobangbang.
Ti naited ket pakabuklan ti 60% a mabatayan ti LGU-Cabugao idinto ta iti 40 % ti ited met ti DOLE-Vigan City.
Maibatay iti rekord ti Human Resource Management Office (HRMO) ti LGU-Cabugao, nagtrabahoda kadagiti Opisina iti nadumaduma a Departamento ti LGU a nakaidesignaranda. 20 nga aldaw ti naituyang a panagtrabaho ti tunggal maysa kadagitoy nga estudiante a naggapu kadagiti pageskuelaan.
Iti pannakiuman ti Web In-Action kadagiti nagtrabaho, imbatadda nga agyamyamanda unay iti LGU-Cabugao ta dakkel ti maitulongna iti panagtrabahoda a nakateggedanda iti gastosenda nga agbasa.
Kabayatanna, nangrugi metten dagiti 20 nga estudiante iti 2nd Batch SPES Employees iti Hulio 2019. Maikkanda met iti maipada a pribilehio a kas iti 1st Batch. (Web In-Action)
No comments:
Post a Comment