Cabugao, Ilocos Sur – Naileppas ti panagsanay dagiti Trainees a naggapu iti innem a barangay iti ili a Cabugao, Ilocos Sur a nangrugi idi Hulio 25, 2019 ken nagpatingga iti Hulio 26, 2019. Naangay ti panagsanayda iti Cabugao Cultural and Sports Complex, Brgy. Rizal, Cabugao, Ilocos Sur. Naggapu dagiti nagatendar a kameng ti 4 Ps ken Listahanan Members iti Barangay Namruangan; Barangay Cael-layan; Barangay Daclapan; Brgys. Baclig; Catucdaan ken Salapasap.
Segun ken ni Ms. Marilou Torres, Sustainable Livelihood Program (SLP)- PDO a nakadestino iti 4 Ps Municipal Link, LGU-Cabugao a naiprograma dagiti bilang ti nagpartisipar iti kada barangay kadaytoy a kurso nga igannuat ti Sustainable Livelihood Program (SLP) ti DSWD-RFO 1 ken kakammayetna iti LGU-Cabugao nga idauluan ni Mayor Edgardo “Ediboy” S. Cobangbang, Jr.
Kabayatan ti seminar ket naammuan nga umabot iti P450,000 ti pundo a mailatang iti tunggal Asosasion ket agduduma ti partuatenda a proyektoda ngem sakbay a maawatda ti nadakamat a gatad ket maaramid iti panagbisita nga iyeskediul ti DSWD-RFO 1 ket kasapulan a maaramid dagiti Asosasion dagiti sumaganad: Communal Garden; pannakasanay pay kadagiti kameng kadagiti umisu nga aramidenda tapno masustener ti ibangonda a proyekto iti las-ud ti barangayda.
Dagitoy nga aksion ken inisiatiba ket mangipakita iti pannakaragpat ti pannakabukel ti proyekto a paset iti pro-poor programs ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para kadagiti makasapul iti pagbiaganna nga umili. # (Web In-Action)
No comments:
Post a Comment