Cabugao, Ilocos Sur – Babaen iti koordinasion ti Market Supervisor Office ken ti MENRO Office ti LGU Cabugao, maisaysayangkat iti nasaknap a panaglinis iti las-ud ti Tiendaan (NISTC Public Market) iti kada aldaw ti lawas agsipud ta mausar ken kasapulan ti inaldaw iti nadakamat a pagtagilakuan.
Naammuan a napagnunumuan iti pannakamantener a kanayon iti uneg ken ruar iti Tiendaan. Mairaman pay a maasikaso ti sanguanan ti Food Court.
Masansan nga mainspeksion babaen kadagiti agrebbeng dagiti paglakuan iti makan iti uneg ken iti ruar kasta metten iti pagibellengan ti danum ken dagiti Comfort Rooms iti uneg ken ruar a kanayon a madalusan ken mamantener.
Dagitoy a gay-at ket pagtinnulongan dagiti pannakabagi ti Clean and Green kasta metten dagiti Personnel ti NISTC nga aramiden iti inaldaw.
Kabayatanna, adu ti maragsakan ken agyamyaman nga umili nangruna kadagiti aglaklako iti nateng; prutas ken nadumaduma a tagilako iti nainayon a nagdur-asan ti NISTC Public Market a pannakaaramid ti permanente a linong iti bandanat’ laud ken abagatan a parte ti Tiendaan ket manam-ayan ita dagiti aglaklako ken aggatang.
Dagitoy nga aksion ken inisiatiba ket mayataday iti agtultuloy a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti naan-anay a pannakamantener daytoy a pampubliko a pasilidad tapno mapagtalinaed iti napintas a serbisio para kadagiti marketgoers ken iti sanitasion para iti sapasap. # (Web Situational Report)
No comments:
Post a Comment