Cabugao, Ilocos Sur – Maysa kadagiti nadakamat a pakaseknan ti sapasap a dinakamat ni Mayor Edgardo “Ediboy” S. Cobangbang, Jr. iti pannakisaritana iti Pamilia-LGU kalpasan ti Flag Ceremony idi Hulio 22, 2019 ket iti panagraira ita ti sakit a dengue iti lokalidad kas pakdaar iti Department of Health (DOH).
Iti panangigigir ti Ama ti Ili iti salun-at ti sapasap, nairubuat iti intensive drive ken Oplan Taob kadagiti pageskuelaan a pagtitiponan dagiti ubbing babaen iti ipapan dagiti Empleado ti Munisipio a panagpidut ti non-biodegradable materials kas iti nagsupotan a selopin ken plastic ken kangrunaan iti panangipakboda kadagiti nataya a danum kadagiti amin a paset ti arubayan ti pageskuelaan kas koma dagiti nakatiwangwang a lata; tumbler a pagikkan ti basura; aniaman a goma ken kanaigna a banag a makataya iti tudo wenno adda makargana a danum.
Ti Oplan Taob a programa ti LGU-Cabugao ket nairugi iti pageskuelaan ti Cabugao South Central School sa maisaruno dagiti dadduma a pageskuelaan (by cluster) apaman a maileppas ti Cabugao North Central School itatta nga aldaw.
Iti nadakamat nga aktibidad, tumartarabay met da ABC President Thaddeus U. Soller; HRM Officer Mimi S. Sison ken ni Edgar S. Balangatan, MENRO-Designate.
Daytoy a gannuat ket pannakipaset ti Munisipio kadagiti wagas/pamay-an a manglapped/mangparmek iti panagraira ti dengue a napeggad a sakit babaen iti panangiwaras ti insekto a lamok iti aglawlaw ken iti komunidad a daytoy ti kangrunaan a malapdan. # (Web In-Action)
No comments:
Post a Comment