Thursday, July 21, 2011

Dwarf Sperm Whale, Naidaknir sadiay Sabangan, Sinait

Cabugao, Ilocos Sur – Mapapati a maigapu iti pannakakibor ti taaw gapu iti narungsot a bagyo Falcon ti nakaisadsadan ti lalaki a Dwarf Sperm Whale nga agatiddog iti 228 sentimetros,  agakaba iti 170 sentimetros ken manamnama nga agdagsen iti 250 kilogramos iti aplaya ti Barangay Sabangan, Sinait, Ilocos Sur idi Hulio 1, 2011.

 

Nagreport ti Fishery Coordinator ti MAFC  ken bumarangay ti Barangay Sabangan iti opisina ti Bureau of Fisheries and Aquatic Resources (BFAR) iti Vigan City ket dagiti opisiales ti Buro ket naikumitda  iti opisina ni Mayor Ediboy S. Cobangbang, Jr. iti pannakataming dayta a pakaseknan agsipud ta adda iti Gobierno Munisipal ti Cabugao da  Dr. Melvyn Castro ken Mrs. Milagros R. Paz, Attending Veterinarian ken Fishery Coordinator Designate kas panagsaganadda gapu ta nagsanayda iti Philippine Marine Mammals  Stranding Responses idi Hunio 21-24, 2011 sadiay Subic Bay Freeport Zone, Subic, Olongapo City. 


Babaen ti inwayat ni Dr. Castro a post-mortem inspection, natakuatan a  natay ti pating a naidaknir maigapu iti “shock caused by internal hemorrhage due to trauma.” Naitanem ti ayup ti baybay iti kinali dagiti lumugar a paset ti aplaya kalpasan ti nasao nga inspeksion dagiti autoridad ti BFAR ken LGU.#

No comments:

Post a Comment