Friday, July 15, 2011

SWINE FATTENING TI TUROD MPCI, NABALLIGI

Cabugao, Ilocos Sur – Pammasingked ti agtultuloy a balligi a kasasaad ti Turod Multipurpose Cooperative, Inc., Brgy. Turod, Cabugao, Ilocos Sur ti pannakagun-odna ti proyekto a Swine Fattening manipud iti LEAD (Livelihood Enhancement Agricultural Development) ti Regional Agriculture and Fishery Council (RAFC) babaen ti Department of Agriculture, Regional Field Unit 1, San Fernando City, La Union.

Sakbayna, babaen iti surat ti RAFC-DARFU 1 ken ni Mayor Ediboy S. Cobangbang, Jr., naipadamag ken nailanad ti pannakaited ti livelihood program a Swine Fattening ket nakitinnulong ti Mayor iti itineraria dagiti pannakabagi ti kooperatiba ken LGU a napan mangawat ti pakabuklan ti proyekto.
Mismo a dagiti dadaulo ti Turod MPCI ti napan nangawat ti tseke nga agbalor ti P150,000.00 nga idauluan ni Brgy. Captain Inocencio Sadac ken pannakabagi ti DA-LGU sadiay DA Regional Office 1 idi Hunio 21, 2011.

Nagrugida iti 43 a piglets ket dagiti sumaganad ti napili a mangyuna itoy a proyekto: Edgardo Garcia, Miranda Garcia, Marlon ken Emilda Raciles, Marciano Raciles, Jr. ken Melvin Raciles, Benjamin ken Crsitina Aquino, Mario ken Elmie Soto,Loreto Sadac, Sarturnino ken Marylene Soller, Elmer Ragon, Sr. ken Elmer Ragon, Jr. Edmund ken Imelda Pacnis, Ferdinand ken Leonarda Sadac, Andy Sadac, ken Joey Soller.

Pagyanan ken ipakan iti taraken ti obligasion ti mangtaraken. Maysa a roll-over scheme daytoy a proyekto tapno sapasap a mabenepisiaran dagiti miembros ken mapatuladan pay dagiti di pay nakapadas a nagtaraken iti baboy kas maysa a napintas a pagsapulan.

Maisubli ti naited a puonan kalpasan ti dua a tawen. Uppat a bulan ti kabayag a manguray ti taraknen a baboy sa mabalin a lakuen, segun ken ni Dr. Melvin Castro, DVM ken Livestock Inspector ti DA-LGU Cabugao a tumultulong iti pannakamonitor daytoy a proyekto.

Iti panangbisbisita dagiti pannakabagi ti DA-LGU kadagiti pagtaraknan, manamnama met a kumita dagiti nagtaraken agsipud ta nabun-as met ti nagbalinan dagiti pintan-ayda a burias, segun ken ni Mrs. Joenah G. Sevilleja, maysa kadagiti Municipal Technologist ti DA-LGU a mangmonmonitor ti proyekto.# (Joed Sajonia) 






 

No comments:

Post a Comment