Friday, July 22, 2011

ITI PANAGBISITA NI DA SEC. ALCALA, DUA A BALLIGI TI NARAGPAT TI ILI A CABUGAO

CABUGAO, ILOCOS SUR - Nakallalagip kadagiti taga-Cabugao, Ilocos Sur ti panagbisita ni DA Secretary Proceso J. Alcala sadiay Banaoang Pump Irrigation Project Site, National Irrigation Administration (NIA) , Brgy. San Mariano, Bantay, Ilocos Sur idi  Hulio 21, 2011 nga inatendaran  dagiti  dadaulo  ti mannalon ken opisiales-lokal  iti nadumaduma a Munisipalidad ti Ilocos Sur.

Inikkan ni Sekretario Alcala ti pammigbig iti pannakabangon ti kabaruanan a Greenhouse ti ili ti Cabugao babaen ti panangidaulo ni Mayor Ediboy S. Cobangbang, Jr. kas kangrunaan a nangirepresentar ti delegasion ti  LGU-Cabugao. Naisangrat ti nasao a Greenhouse para iti High Value Crops Development Program ti Departamento ti Agrikultura kadagiti umili  ti Cabugao, Ilocos Sur.  Agbalor ti nalpas a proyekto ti Greenhouse iti P351,000.00.

Iti sabali a bangir, babaen met laeng iti High Value Crops Development Program ti DA, nagun-od ti LGU-Cabugao ken Cabugao Vegetable Growers Association babaen ti panangirepresentar pay  ni Mayor Ediboy ket mangted ti Ahensia kadaytoy a  gunglo iti  P500,000.00 nga igatang ti LGU iti Farm Tractor para kadagiti agmulmula ti nateng iti ili.

Tinarabay  met da DA-LGU Municipal Agriculturist Zenaida S. Andrada, MAFC Chairman Rogelio Barlolong, Farmers’ Federated President Elmer G. Bromeo dagiti delegasion ti mannalon ti ili ti Cabugao a napan nangimatang  ti pannakaited kadagita a pagsayaatan a nagun-od dagiti umili ken mannalon iti ili ti Cabugao.

Iti agdama, maibilbilang a “First Class Citizen” dagiti mannalon ti ili babaen ti agtultuloy a panangipatungpal ti Gobierno Lokal kadagiti gannuat a mangpasayaat ti kabibiag dagiti mannalon ken intero nga umili ti Cabugao.# (Joed Sajonia)

No comments:

Post a Comment