Wednesday, July 27, 2011

UMAD-ADU TI MAKI”DAYO” ITI ILI A CABUGAO

Cabugao, Ilocos Sur -  Pinasingkedan ti trakan a taga-sabali nga ili kas iti naggapu iti  Bantay, Vigan City, Batac,Ilocos Norte, Sinait iti umad-adu a bilang ti makidayo iti aldaw ti Sabado iti ili a Cabugao. Baka nga agduduma ti pulina, kasta met iti nuang, adda pay dua a kabalio a naipasirpat iti pagdadayoan.
Mayor Ediboy ken SB Secretary Edward Bautista ti Sinait, Ilocos Sur 



Vice-Mayor Danilo Gazmen kadawanada Mr. Dante Naval - Meat Inspector ken Mr. Edito dela Cruz-GSO Designate
“Mamatikami a nadurdur-asto ti pagbanagan daytoy a pagdadayoan kadagiti asideg a masanguanan,” imbatad ni Roel Pre, mangmanmanehar iti Pre Livestock Dealer a kukua ni Brgy. Captain Rosario Sani Pre iti Brgy. San Julian, Bantay, Ilocos Sur iti dayta nga aldaw ti Hulio 23, 2011. “Ditoy pay la  a pagdadayoan nga  makitinnakunaynay dagiti opisiales ti ili.”


Iti kanikamanon a Sabado a panagdadayo, naanus a makidinnanggay ti Ama ti ili, Mayor Ediboy S. Cobangbang, Jr., Vice Mayor Danny Q. Gazmen, ABC Chairman, Rizal Brgy. Captain Teddy U. Soller ken dadduma pay a kakapitanes kasta met dagiti pannakapangulo ti nadumaduma nga opisina iti LGU babaen ti panangyuna da Edito de la Cruz, Licensing Inspector ken GSO-Designate, Dante Naval, Meat Inspector,  Dr. Melvyn Castro, DVM, Livestock Inspector ken uray met ni Dr. Cesar Soller, DVM, Farm Manager ti BARANG-AY Farm ti Provincial Government a masarakan iti Brgy. Labnig, San Juan, Ilocos Sur. Isu pay ti mangimaton ita ti panagklase ti Ladderized Agriculture Course nga inyusuat ti Gobierno Probinsial  babaen ti panangitandudo ni Gob. Luis “Chavit” Singson ken Vice Gov. DV Savellano. 

 “Maiduma ti kinadalus ti aglawlaw, kaadda ti panganan ken pagmeriendaan ken paglakuan ti makan a mabalin a mayawid kas iti letson, nalawa a pagparadaan ti lugan, awan birokemon,” kinuna ni Brgy. Captain Ruben Ibbay ti Brgy. Baracbac, Sinait, Ilocos Sur, maysa kadagiti nalatak a  livestock traders a mapmapan iti nadumaduma a pagdadayoan iti intero a Northern Luzon.
    Babaen ti report ti opisina ti Dayo, umad-adu ti bilang ti mapasamak a panagginnatang kas ipaneknek ti bilang ti mapapelan a transaksion.


“Mapareggetkami nga umay gapu ta makitinnarabay dagiti opisiales ken asideg ti karayan a pangipalamiisan kadagiti maibiahe nga ayup ken nalawa ti pagparkingan,” kuna met ni Conrado de los Santos, 63, akinkukua ti Jonas Livestock Trader iti Brgy. Nagsangalan, Vigan City. Inlatak ni De los Santos ti paliiwna a naksayan ti bilang ti makidayo iti kabangibang a dayoan idi naglukat ti Dayo ti ili a Cabugao gapu ta umaydan ditoy ti kaaduan a trakan.

 




   
                    Malaksid kadagiti pagpalamiisan ken panganan a mangatrakar ti makidayo, nabatad pay ti plano ni Mayor Ediboy iti masanguanan  a pannakasemento ti  nalawa nga espasio iti laud-nga-abagatan ti Dayo ken mapasayaat ti pangpang ti Karayan Cabugao nga asideg ti pasdek ti Dayo. # (Joed Sajonia)

No comments:

Post a Comment