Cabugao, Ilocos Sur - Nanayonan ti adalen dagiti nagsanay iti Welding Skills Training a naggapu iti nadumaduma a barangay ti ili a Cabugao, Ilocos Sur iti Cabugao Cultural and Sports Complex, Brgy. Rizal, Cabugao, Ilocos Sur idi bulan ti Pebrero 2017.
Imbatad ni Mr. Christian Paranada, Trainee a taga-Barangay Quezon, Cabugao, Ilocos Sur nga agsagsaganada ita agraman dagiti 16 a kakaduana nga aggraduar a Taga-Cabugao iti panagatendarda iti Graduation Ceremonies nga isayangkat ti TESDA ken ti Igama Colleges Foundation, Inc., Badoc, Ilocos Norte para kadakuada a maangay a mismo iti nadakamat a pagadalan inton Abril 6, 2017.
Innayon dagiti 17 a Graduates iti panangipeksada iti naan-anay a panagyamanda iti LGU-Cabugao iti panangidaulo ni Mayor Josh Edward S. Cobangbang ta naiyagpang nga NC II ti panagsanayda ken mainayon dagiti dadduma pay a naitulong ti Munisipio.
Ti nainayon nga aldaw a panagsanayda tapno makompletoda ti kasapulan ti NC II ket nagpaut iti 10 nga aldaw, segun ken ni Mr. Mark Lester Acdan, Trainor manipud iti Igama Colleges Foundation, Inc., Badoc, Ilocos Norte.
Kadua ni Mr. Acdan ni Mr. Benny Cariaga, Trainor a nangsanay kadagiti 17 a Graduates ti Welding.
Daytoy a panagsanay ket impatungpal ti LGU-Cabugao babaen iti BUB Program ti DILG ken iti Technical Education and Skills Development Authority (TESDA)-Vigan City ditoy Cabugao ken iti Igama Colleges Foundation, Inc. Management kadagiti indibidual a mangpadur-as iti kabaelanda iti teknikal a kurso kasapulan iti lokalidad ken iti abroad iti agdama. # (Web In-Action)
No comments:
Post a Comment