Cabugao, Ilocos Sur – Agtultuloy a madalusan ken maisagana kadagiti umili a naayat nga agpasiar, aglang-ay ken agrelaks iti natalinaay, napresko ken nawaya a masakupan ti Cabugao Central Park (CCP) a masarakan iti ampir ti National Highway, Brgy. Bonifacio, Cabugao, Ilocos Sur nangruna iti panagrugi ti Ragsak Cabugao Festival 2018 ita a bulan.
Daytoy ti maipanamnama dagiti Caretakers iti CCP. Kinapudnona, isuda pay ti mangidaulo nga ag-engine ken manual grass cutter a mangmantener kadaytoy a historikal a parke a nagsaadan idi ti daan a tiendaan.
Ti CCP ket daytoy ti pakaang-angayan dagiti dadakkel nga aktibidad ti LGU nangruna iti Piesta ti Ili kasta metten kadagiti selebrasion ti Holidays, pakontes ti DepED ken kanaigna a mangpabaknang ti kultura, sosial ken pannakipagili ti Cabugao.
Mapunno ti aglang-ay iti sardam ti CCP iti rinabii nangruna iti summer months ken weekends ken naruay ti ag-jogging iti agsapa.
Ita pay ket naisaganan dagiti kasapulan iti panagrugi ken pannakaangay dagiti pabuya ken aktibidades iti aldaw ken iti rabii ti Piesta ti ili iti Abril 2018. # (Web In-Action)
No comments:
Post a Comment