Cabugao, Ilocos Sur – Mairugi ti 12 nga aldaw a panagsanay dagiti 4 Ps Beneficiaries iti panaglutuan manipud kadagiti barangay ti ili a Cabugao, Ilocos Sur mangrugi iti Abril 4, 2018 ken agpatingga inton Abril 15, 2018 ket naangay ti umuna nga aldaw ti panagsanayda iti Rizal Park, Barangay Rizal, Cabugao, Ilocos Sur.
Daytoy a kurso ket igannuat ti Sustainable Livelihood Program (SLP) ti DSWD ken nakikammayetan ti LGU-Cabugao nga idauluan ni Mayor Josh Edward S. Cobangbang para iti panagsanay dagiti makasapul iti panggedanda a kababaihan kadagiti Barangay ti ili.
Iti nasao a panagrugi ti panagsanay, nagatendar da Mrs. Wilma S. Cruz, Focal Person ti SLP Cabugao ken ni Ms. Leilani Queypo, SLP-PDO ti SLP-DSWD kasta metten dagiti Staff ti 4 Ps Municipal Operations Office (MOO)-Cabugao.
Iti umuna nga aldaw ti panagsanay, nangited ti Briefing ni Ms. Queypo maipapan iti pakabuklan ti programa ti SLP iti DSWD ken nailawlawag met ti pagrebbengan nga aramiden dagiti agsanay kabayatan iti training period.
Immuna a nagdemonstrar dagiti Trainors a naggapu iti University of Northern Philippines (UNP), Vigan City maipapan iti panagluto ket aktual iti aramiden dagiti Trainees iti sumaruno nga aldaw ti panagsanay. # (Web In-Action)
No comments:
Post a Comment