Cabugao, Ilocos Sur – Naangay ti panagmula ti Mangrove Seedlings iti saan pay a namulaan a paset ti katangriban iti Barangay Salapasap ken Barangay Sabang, Cabugao, Ilocos Sur babaen iti panangilunsad dagiti kameng ti Fishermen Association/Fisherfolks kadagiti nadakamat a barangay a kas pannakikaysada iti pannakapaberde kadagiti kakadilianan ken paset ti Clean and Green Program-Coastal Area ti Munisipio nga idauluan ni Mayor Josh Edward S. Cobangbang iti nagsasaganad nga eskediul itay nabiit.
Umabot ti 15,000 a mangrove seedlings ti naimula: iti Brgy. Salapasap ken 25,000 Mangrove Seedlings iti Barangay Sabang, segun ken ni Mr. Nereo S. Daproza, Municipal Fisheries Coordinator a nangtarabay kadagiti mangrove planters.
Kanaig daytoy, regular met a maar-aramid ti coastal clean-up nga igaygay-at dagiti multi-sectoral associations iti uneg dagiti nadakamat a barangay tapno mabisita ken madalusan dagitoy a namulaan ti mangrove a parte ti kabaybayan, segun ken ni MENRO Edgar S. Balangatan, AT ti LGU-Cabugao.
Innayonna a masirmata a kalpasan ti sumagmamano a tawen, agminarton ti pintek dagiti maimula a mangrove ket iti panagkasamekan ti katangriban iti sumagsaganad a tawen ket masalakniban dagiti agnanaed iti igid ti baybay iti après ti danum-baybay no agbagyo ken agresulta ti napintas a pamataudan ti pagbiag dagiti agindeg kadagitoy a barangay ta agbalinto a sanktuario ti ikan ken billit dagiti dadakkelton a mangrove trees.
Dagitoy nga aksion ken inisiatiba ket gubuay ti nakammayet a panagtutunos ti amin a sektor a mangpaberde ti katangriban babaen iti panangilungalong ti Gobierno Munisipal nga idauluan ni Mayor Josh Edward S. Cobangbang ken ti BFAR-Region 1 tapno maprobitsar dagiti proyekto ken programa ti nasao nga Ahensia iti pagsayaatan dagiti agindeg iti coastal barangays ti ili. # (Web In-Action)
No comments:
Post a Comment