Cabugao, Ilocos Sur – Naipasdek ti Municipal Fish and Tree Nursery babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno adda pagpatanoran ti hybrid tilapia breeder a mangpataud ti fingerlings nga as-asideg a pangalaan dagiti maseknan a mannalon/mangngalap nga adda piskeriana imbes a mapanda iti BFAR Office a sangarantaan idiay kabesera.
Iti 5,000 a fingerlings a naipupok idi Hulio 2011, naganakda met idi Nobiembre 2011 iti sabali a fingerlings a dagitoy ita ti maiwarwaras kadagiti umili a makasapul. Iti lima-katao a dimmawat ti patan-ayenna, 2,000 a bilang ti Tilapia fingerlings ti dagup ti naiwaras nangrugi iti apagtapog ti Enero 2012. Addaan ti Fish Nursery iti innem a ligason a pagpupokan ket nagaget dagiti taga-DA LGU, da Mrs. Milagros R. Paz ken Mr. Robert Savella, agpada a Teknisian ti Munisipio ken Fisheries Coordinator a mangpadpadakkel kadagiti naipupok a lames ken mangmonitor ti inaldaw a kasasaadda.
Iti sabali a bangir, simmangkaadu met ti bilang dagiti umili/organisasion nga agnanaed iti nadumaduma a barangays ti naikkanen/agkalikagum a maikkan ti seedlings a naidarnap iti asideg ti Fish Nursery nangruna idi bulan ti Hunio-Hulio2011 a panagmumula ti kayo agsipud ta kadam-eg ti daga.
Nupay adda NGO (Tanim Kalikasan, Inc.) a nagiwaras ti libre a seedlings nga imulada, inkagumaanan latta met ti Munisipio ti maaddaan ti kabukbukodan a nursery tapno adda katinnulong ti Ahensia ti DENR ken NGO a madadaan a pagalaan ti seedlings no kasapulan.
Iti kaadu ti dimmawat ti mulana a seedlings, nainayon a monitoren ken tarabayen ni MENRO-Designate Edgar S. Balangatan, Municipal Technologist ken mangipalnaad a di nagriro ti Munisipio ti panangipasdekna ti Tree Nursery tapno ad-adu ti maallukoy nga umili a makipagmula iti kayo a pangsalbar ti kritikal a kasasaad ti nakaparsuaan.
Innayon ni MENRO Balangatan a gasut a ribu a pinuon ti kayo ti manamnama/target a maimula ita a Tawen 2012. Asinoman nga indibidual ken organisasion nga interesado a mayat nga agmula ket kontakenda isuna: MENRO Edgar S. Balangatan iti Munisipio ti Cabugao, Ilocos Sur para iti pannakaisagana ti maala a seedlings. # (Web In-Action)
No comments:
Post a Comment