TECHNO-DEMO TI PURAW A HYBRID CORN!

Cabugao, Ilocos Sur (Enero 4, 2012)  – Maysa met  a pangbiitan a pagkuartaan  ita ti puraw a mais ta malaksid a mailako a  para saramsam ti publiko, mabalin a suno (maysa met nga staple food)  ti bagas (no panagkikirang)  ken dadduma pay a pakairamenanna.

Ti bukel a pinartuat ti Seminis Corporation a managan ti Tender 58 (Hybrid Waxy Corn) ket naimula ita ken naidemonstrar iti daga nga aglawa iti  3,500 metro kuadrado  idiay Barangay Sagayaden Norte, Cabugao, Ilocos Sur (sango ti Seguban Warehouse) a naidesignar babaen ti DA-LGU Cabugao a pakaar-aramidan ti demo-farm ti nateng ken dadduma pay a hybrid cash crops a tarabayen dagiti eksperto iti agrikultura ken  panagmulaan.

Maikadua daytoy a gundaway a pannakaimula ti puraw a hybrid a mais, segun ken ni Mr. Edgar S.  Balangatan, Municipal Technologist ken Techno-Demo Field  Coordinator. Daytoy Tender 58 ket naresistansia, naimas a kanen no maluto, maapit iti unos ti 58 nga aldaw,  ken nabiit a pagkakitaan ti kuarta ta nalaka a lakuen.  Nadiskubre daytoy  manipud pagilian ti  Thailand ngem mailaklako idiay USA ken 1 kilogramo ti kada pakete. Napaneknekan nga 85% ti germination (panagtubo) daytoy a bukel ken nalaka a maiyadaptar  iti aniaman a lokalidad.

Nakanatad ti panagtubona a naimula a bukel ti Tender 58 ken Classica

“Makitkita ngamin a palpalaran ti panagmula ti mannalon ti puraw a mais. Babaen ti techno-demo, maipamaysa a takuaten ti umisu a teknolohia ti panagpadakkel ken nabibiit a panagapit. Mapaglakuan ken kabiitan a pannakasolbar ti pinansial a kasapulan ti kitkitaen pay ni pada a mannalon,” innayon ni MT Balangatan.

Iti agdama, kadaanan a bin-i  ti kaaduan a maimulmula iti away a maibabaet kadagiti uma ken bangkag. Inlatak ni MT Balangatan a padasen ti mangmula iti kalasagan a sinilong sa adaptaren ti teknolohia ket presto,  dumakkel ti masapulan ni mannalon.

Mayataday unay ti direksion ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr.,  ti pannakatulong dagiti mannalon a mangtakuat/mangipakat  kadagiti naipanawen/nabiit a cash crops a maimula a  kas iti puraw a mais a mangsolbar ti pagkasapulan ti mannalon malaksid ti mapaglakuanna pay  kadagiti naimula iti  regular a panagaapit kas iti tabako ken pagay.

“Saan a problema ti market-na, Apo, ta pagiinnagawanda a kompraen idiay tiendaan. Mabalin pay a danonen dagiti komprador no ipalubosmo,” impakamakam ni MT Balangatan. # (Web In-Action Report)