Cabugao, Ilocos Sur – Inyalat ti Barangay Salomague ti Best in Fish Production iti “LAING TI BARANGAY 2011” a pasalip ti LGU Cabugao kadagiti 33 a barangays ti intero a Munisipalidad. Kalpasanna, nayentra a pangsalip ti Munisipio iti Siglat Awards 2011 iti Kapitolio.
Ti Barangay Salomague ket maysa kadagiti pito a Coastal Barangays ti Cabugao ket ti panagkalap ken panagpatan-ay ti ikan ti kangrunaan a pagbiagan dagiti lumugar. Pammaneknek ti inaldaw a nakaangkla nga agduduma ti kadakkelna a barko/barge ti pagkalap iti daungan ti Port Salomague a ditoy nga agur-uray iti mayataday a panawen a panagrubuat nga agkalap iti taaw a manamnama a pakakalapan ti dadakkel nga ikan.
Malaksid ti pagikanan, adda met disso a pagmulaan ti nateng ken pagtaraknan ti dinguen kas iti baka ken kalding a nakasapulan a maparti kadagiti okasion. Ti Puerto ti Salomague ti mangmangted ti pagsapulan dagiti lumugar. Kaaduanna met ti propesional ken adda iti nangato a posision iti publiko a pagsaadan wenno iti pribado a sector. Kaaduanna a pamilia ti adda ti asideg a kabagyanna idiay Hawaii ken Mainland USA ken dadduma pay a paset ti lubong nga agaw-awid met nga agbalikbayan no dumteng ti Piesta ti ili ken Paskua.
Ar-araken ti Turista ti Barangay Salomague isu a di mapilaw dagiti nagtubo a kas uong dagiti beach resorts, cottages, kubo ken paginanaan iti natalinaay ken napresko nga igid ti baybay.
BARANGAY SALOMAGUE: NALATAK TI DAUNGAN ITI BARKO DITOY AMIANAN
Maibilang a nagasat a lugar ti Barangay Salomague agsipud ta daydaywen ti adu a puli ken turista manipud iti sabali a pagilian nangruna iti Hawaii ken Mainland maigapu iti historikal a pakasaritaan a nagrubuatan dagiti Sakada a napan nakigasanggasat idiay Hawaii.
Gapu kadaytoy a migrasion dagiti tattao, nangibunga ti napintas a resulta iti panagbiag dagiti pamilia dagiti Sakada ken nausatan pay ti papanda panagnaed sadiay ballasiw-taaw. Gapu iti panagsanglad ti agduduma a lugan-pangbaybay iti pantalanna, nasamay ti panaginnallatiw ti tagilako ti agsumbangir banag a napaspasamaken uray pay manipud iti kanikamanon a siglo. Ti kinaregget ti masasao a “barter trade” ti nagduduma a pagilian ket daytoy ti nanipudan ti pannakadiskubre ti napintas a daungan ti barko iti Barangay Salomague.
Nupay addan pakpakauna a gay-at ti Gobierno Nasional ken Lokal a mangparegget ti panagbalin ti Puerto Salomague a kas “transit point” ti nadumaduma a pangkomersial a barko, manamnama a maitandudo daytoy a gannuat tapno rumegta ti aktibidad ti ekonomia iti Barangay Salomague nga agsaknap pay kadagiti kabangibangna a lugar, ili ken probinsia.
Naisangayan met a parabur ti Barangay Salomague ti kaadda ti napintas a pagdaungan ti barko. Kasta met iti napintas a pagikanan iti sungaban ti Puerto. Agsipud ta naregget ti Gobierno Lokal a nangipaulog ti paglintegan a mangprotektar iti kabaybayanna, naguyugoy dagiti agduyos iti sportsfishing ken scuba divers a surnadan dagitoy a disso nangruna kadagiti agpipiknik.
Adu met iti barbarangay iti igid ti Baybay iti intero a Rehion Uno, ngem manmano ti adda iti kas iti masarakan iti Barangay Salomague nga adalem ken estratehiko a pagsardengan/paglandingan ti barko kabayatan nga iwayat dagiti tripulante dagiti transaksion iti komersio.
Agsipud ta nairapin iti napanday a linteg iti nangatngato a benneg ti turay daytoy a gannuat, manamnama nga idarirag ti pannakabagi ti Kongreso daytoy a pakaseknan iti laem ti Kongreso. Iti kasta, marugian metten ti naannayas nga iseserrek dagiti makinegosio a sabali a pagilian ditoy pagiliantayo.
Sinangaili ti Gobierno Probinsial ti Ilocos Sur dagiti negosiante nga Intsik babaen ti maysa a programa ken pangaldaw iti Provincial Capitol idi Hulio 1, 2010, umuna nga aldaw ti panagtakem ni Gov. Luis “Chavit” Singson kas ama ti probinsia. Umay kitaen dagiti sangaili no ania a negosio ken lugar ditoy probinsia ti kasayaatan a pangibautanda iti puonanda. Babaen ti powerpoint presentation, imbinsabinsa ni Dr. Enrie Mendoza dagiti lugar a nasayaat a pagibautan iti negosio kas iti Salomague Port iti Cabugao, Ilocos Sur ken dadduma pay a lugar.
Nakibeddeng ti Barangay Salomague iti Barangay Turod ti Daya, Barangay Sabang ti amianan, Barangay Dardarat iti abagatan ken Baybay Tsina iti laud.
Iti agdama, addaan ti Barangay Salomague iti P1,105,284.00 a pakadagupan ti pundona iti CY 2011. Addaan ti P1,060,284.00 a bingayna iti Internal Revenue Collection. Addaan iti mabatayan a P212,056.80 iti 20% Development Fund ket maiserbi iti Clean and Green Program, Maintenance of Day Care Services, Maintenance of Health and Medical Services, Nutrition Program, Barangay Hall Completion, R & M of Dap-ayans and CR, Repair and Maintenance Works of Barangay Hall and Brgy. Stage Roof (repainting), Construction of Dap-ayan/Shade, Concreting of Barangay Road (alley), ken Construction of Sea Wall.
Iti sabali a bangir, ti Sangguniang Kabataan ket makabagi met iti pundo a P110,528.40 ket maiserbi iti sumaganad: Sports Development, Environmental Protection, Capability Building, Anti-Drug Abuse Council, Anaraar Subscription, Annual Dues, Livelihood Projects, Repair/Maintenance of Lights in the Auditorium and Streetlights, Maintenance of Computer, Infrastructure Projects (Repair and Maintenance).
DAGITI OPISIALES TI BARANGAY SALOMAGUE
PUNONG BARANGAY Eliseo R. Serrano
SANGGUNIANG BRGY. MEMBER Perla C. De la Cruz
-do- Melchor T. Valdez
.do- Constante D. Carbonel
-do- Teresa T. Valle
-do- Dante B. Morales
-do- Walter V.Mendoza
SK Chairman Janvier B. Baclig
Barangay Secretary Wilfredo S. Savella
PUNONG BARANGAY Eliseo R. Serrano
SANGGUNIANG BRGY. MEMBER Perla C. De la Cruz
-do- Melchor T. Valdez
.do- Constante D. Carbonel
-do- Teresa T. Valle
-do- Dante B. Morales
-do- Walter V.Mendoza
SK Chairman Janvier B. Baclig
Barangay Secretary Wilfredo S. Savella
Barangay Treasurer Diodelin S. Serrano
No comments:
Post a Comment