Cabugao, Ilocos Sur - Naangay ti emerhensia a miting dagiti opisiales ken miembros ti Cabugao Livestock Traders Association nga idauluan ni Presidente Marciano “Ammas” Raciles idi Enero 14, 2012 iti mismo a pagda-dayo-an. Adda 25 a miembros a nagatendar.
Dagiti sumaganad ti natratar ken napagnunumuanda:
- Tunggal miembro ket aggunay nga agbirok ti umayna idayo ken agawis ti tao wenno trakan nga agidayo.
- Maipakapet dagiti napagtutulagan a multa a nailanad iti registration copy ti asosasion ket no sansanenna ti aglangan nga awan ti nainkalintegan a gapuna, maikkat ti naganna iti listaan ti miembros.
- Tumulong dagiti miembros nga agpanunot/makipagtaming iti pagsayaatan/pagpigsaan ti dayo.
- Mapabulodan ti tunggal kameng ti pagpuonan ket sana la awaten ti gatad no adda gatangennan a nuang/baka ken apaman a malakona, ipulangna ti kantidad iti Tesorero ti asosasion ket kuakua ti trader ti aniaman a mapagket iti transaksion.
- Maminsan la nga agkamali ti bumulod, dinanton maipidua ti ibubulodna.
Naisaruno ti pannakabinsa ti linaon ti Financial Statement ti asosasion babaen kada Mr. Marciano Raciles, Presidente ken Mr. Rudy Quileza, Tesorero. Kaaduan a naggastuan ti panangiprosesoda ti rehistrasionda iti DOLE-Vigan City. Adda payen naipaaramid nga ID-da. Aganay a P7,000 ti natda a pundoda a mabalin a disponeren.Napagkaykaysaanda pay a dumatagda iti opisina ni Mayor Ediboy inton Enero 16, 2012 tapno padamaganda ti Ama ti Ili pakaseknan iti mapaspasamak iti asosasionda ken iti Dayo ken kiddawenda ti pannakatulongda iti pannakapataud ti umdas a pagpuonanda.
Napagnunumuanda pay nga agmitingda iti kabiitan tapno maiwaras ti ID-da ken mapagsasaritaanda met iti partisipasionda iti umadani a panagpiesta ti ili a Cabugao. # (Web Team)
No comments:
Post a Comment