Friday, January 6, 2012

DAGA TI SIMBAAN KEN MUNISIPIO, SIMPAEN TI OPISINA TI ASESSORIA

Cabugao, Ilocos Sur  –  Para iti interes ti kaaduan,  naipanawenen nga asikasuen  ti Opisina ti  Municipal Assessor ti ili a Cabugao, Ilocos Sur ti pagbeddengan/plastar  ti daga ti Munisipio ken ti Simbaan Romano Katoliko babaen ti panagpinnasingked   iti agsumbangir a partido iti pannakaipasdek ti pinal a kasasaad dagitoy  sakbay a maaramid ti papelesda  nga agpadpada.

Kabayatanna, addan  napagnanamingan ti agsumbangir a partido: Bishop Ernesto Salgado ti Archdiocese of Nueva Segovia ken ni Mayor Edgardo “Ediboy” S. Cobangbang, Jr. maipapan iti    panagsinnukat ti lote iti dati  a nadappatan  ti Munisipio a lote ti Simbaan kasta met  iti   naala ti Simbaan a paset ti daga ti Munisipio iti ruangan ti simbaan    babaen iti maaramid a Deed of Exchange.

Iti sabali a bangir, as-asikasuen pay ti Municipal Assessor’s Office ti ili ti papeles ti  lote a nakaipasdekan ti opisina ti Bureau of Fire Safety (BFP)  iti asideg ti Municipal  Market (NISTC) babaen iti  Affidavit of Correction iti aktual a  rukod ti dua a disso  a sanikua ti Munisipio.

 

Kalikaguman ni Mayor Edgardo “Ediboy” S. Cobangbang, Jr. a masimpa  dagitoy a pakaseknan ti Munisipio iti  nasapsapa a panawen  para iti interes ti umili ken ti Simbaan  para iti nalawag/sangkadireksion a pagtaktakderan ti agdama nga Administrasion iti  “Good Governance”. 

Mayataday met iti pannakabigbig ti LGU Cabugao iti agdama  a kas recipient ti “Seal of Good Housekeeping” manipud iti Department of the  Interior and Local Government (DILG) para iti mayannurot a pannakatarawidwid ti pannakaipataray ti Gobierno  (Transparency)  ken maikanatad a pannakadisponer/pannakaibanag dagiti pundo (Accountability).”#(Web Situational Report)

 

No comments:

Post a Comment