Cabugao, Ilocos Sur – Napili ti Local Government Unit (LGU) ti Cabugao nga idauluan ni Mayor Edgardo “Ediboy” S. Cobangbang, Jr. a kas “Model LGU with Best Practices on Solid Waste Management” ket impaay ti Department of Environment and Natural Resources (DENR) ti nasao a pammadayaw.
Kanaig daytoy, nabigbig met ti uppat a barangays ti Poblasion: Brgys. Rizal, Bonifacio, Baclig ken Quezon iti napintas a kontribusionda ken naipamatmatda nga ulidan kadagiti padada a barangays a nangipatungpal a naan-anay ti sinaguday ti Solid Waste Management Act a pannaka-biblia ti panangdalus/panangprotektar iti aglawlaw.
Idi Enero 16, 2012, pinadayawan ni Mayor Ediboy dagiti uppat a barangays babaen iti panagatendar da ABC President, Rizal Brgy. Captain Thaddeus U. Soller ken Bonifacio Brgy. Captain Valentin S. Tuyor, Jr., iti imatang ti Pamilia-LGU kalpasan ti Flag Ceremony iti Munisipio.
Pinadayawan pay ti Alkalde ni MENRO-Designate Edgar S. Balangatan, Coordinator, Ecology Center ken Solid Waste Management iti akemna a nangibagi ti LGU iti naregta a pannakailungalong ti naannayas a pannakaidalimanek dagiti rugit kadagiti barbarangays ken pannakinaming ti NGO’s tapno mamantener ti kinadalus ti aglawlaw a paggargarawan ti umili.
Segun ken ni MENRO Balangatan, natunos ti umili a nakikaysa kadaytoy a gannuat a pannakaasikaso/pannakasimpa iti pagibellengan. # (Web In-Action)
No comments:
Post a Comment