Thursday, January 5, 2012

UMUNA A MITING TI ABC ITI 2012, NABUNGA!

Cabugao, Ilocos Sur (Enero 5, 2012)  – Naaramid ti umuna a panagmiting (1st Wednesday of the month)  ti Association of Barangay Captains and Councils ti ili a Cabugao, Ilocos Sur nga idauluan da ABC President, Rizal Brgy. Captain Thaddeus “Teddy” U. Soller ken ABC Vice President, Sabang Brgy. Captain  Edgardo S. Cobangbang, Sr. idi Enero 4, 2012 iti SB-ABC Hall, Cabugao, Ilocos Sur a no a sadino a ditoy ket nagatendar ti 30  a Kapitanes iti 33 a Barangays ti ili a Cabugao.

Sakbay ti miting, nakiinnabrasa/nakisarsarita ni Mayor Edgardo “Ediboy” S. Cobangbang, Jr. kadagiti Kakapitanes a kaduana ni ABC President Teddy U. Soller iti ruar ti pasdek kabayatan ti panagrehistro dagiti naud-udi  iti Attendance Sheet.Ti kasasaad dagiti proyekto-impraestruktura ti kangrunaan a napagpapatangan kadagiti kapitanes iti barangayda.

Iti panangrugi ti miting, impadamag ni ABC President Soller a nayalokaranen ti gatad a  maigatang iti Municipal Bus ken Grader ken iti 15 % a counterparting ti LGU kadagiti mairuar a babassit a makinaria ita a tawen 2012  kas iti  tractors, thresher, ken reaper. Maited pay kadagiti nagkalikagum a barangays iti  solar dryers (multipurpose pavement). Sumarsarunonto dagiti makinaria a biagen ti  diesel. Dagitoy a makinaria ket maiyawat iti rehistrado nga asosasion. Nadakamat ti panagkammayet ti Kapitan ken ti Pangulo dagiti mannalon iti barangay a di pay nakagun-od  kadagitoy tapno  makikoordinarda  iti DA-LGU para iti pannakaaramid dagiti kasapulan a papeles tapno makasagrapda met  kadaytoy a counterparting scheme ti LGU ken DA.

Bayat ti panagmimiting dagiti amin a kapitanes ti ili a Cabugao
Innayon pay  ti ABC President a manamnama a maruk-atan ti 3.5 Million a maisangrat iti libre a ganagan para kadagiti mannalon a maiwaras inton Abril 2012.

Naibinsabinsa pay  dagiti naileppasen ,  maituloy ken marugian a proyekto babaen iti Gobierno Munisipal  kadagiti nadumaduma a barangays ken ti manamnama a pannakapundo dagiti saan pay a maituloy ken di nalpas  babaen ti pannakaruk-at ti  Municipal Share iti RA 7171 para iti nasapsapa a bulan ti Tawen 2012 ken dadduma pay a pundo a para-proyekto ti Munisipio. Naipadamag a kangrunaan a mapunduan ket ti pannakaipalawa ti rangtay ti Barangay Quezon iti asideg ti Bulwagang Quezon. Kasta pay iti kasasaad ti  pannakagastos ti 20% Development Fund ti kada  Barangay manipud iti IRA-da  kadagiti livelihood assistance kadagiti organisasion kas iti RIC. 

Nairaman a napagsasaritaan panggep ti pannakigamuloda iti Piesta ti Ili (Ragsak Cabugao Festival 2012). Napagkaykaysaan a kas iti dati a Cluster Barangays ti pakandidata ngem sumublat ti sabali a barangay nga agpakandidata ken naipaganetget a 100 % koma  ti partisipasion ti opisiales ti kameng ti Cluster Barangays. Nairaman pay a napagpapatangan ti reorganisasion ti RIC ita a tawen  ken katinnulong ti Barangay Officials iti pakandidata iti Piesta ti ili  ken ti pannakaipaay kadakuada ti pundo a sag-P20,000 ti tunggal Barangay.

Ni Mayor Ediboy bayat a kapatpatang na dagiti Kapitanes
 
Nagtinnulong pay da ABC President Soller ken LGOO Connie Quinola a nangdiskutir ken nangrisut   dagiti pakaseknan dagiti kakapitanes iti barangayda maipapan iti law of succession, pannakamantener ti disiplina, ken kaarngina a bambanag pakaseknan ti panagipatungpal ti linteg. Kangrunaan pay  a nailawlawag ti pakaseknan ti ordinansa a panagtiliw ti ibbet nga aso iti poblasion. Kasapulan a maipatungpal daytoy  gapu ta masanguanan ti panagsangpet ti adu a balikbayans iti Pebrero 2012.  

Impadamag met ni LGO Officer Connie Quinola  ti DILG-MLGOO  iti  eskediul ti ebaluasion ti Siglat Awards kadagiti napili a barangays a nangabak iti Laing ti Barangay 2011 iti Munisipalidad ti Cabugao. Innayonna a nagun-od ti LGU Cabugao kas recipient ti “Seal of Good Housekeeping” maigapu iti  sistematiko a pannakaannurot dagiti alagaden ti mainugot/mainumo a wagas ti panagtarawidwid ti turay   (transparency) ken umisu a pannakataming ti pinansial/pundo (accountability) para iti umili. Maisagut ti P800,000 a gunggona ti Munisipio iti pannakapasayaat ti coastal road/pannakaaramid ti seawall ti Barangay Pug-os.

Sakbay a nagleppas ti miting, naibunong ti pang-Baro a Tawen a sagut ni Diputado Ryan Luis V. Singson a “wall clock”,   a nakaibutakan ti nagan ken ladawanna,  kadagiti nagatendar a Kapitanes.# (Web In-action) 

No comments:

Post a Comment