Sunday, March 18, 2012

CORONATION RITES TI CABUGAO NORTH CENTRAL SCHOOL

Cabugao, Ilocos Sur – Naangay ti Coronation Rites ti Cabugao North Central School (CNCS)  idi Marso 16, 2012 iti Cabugao Cultural and Sports Complex, Brgy. Rizal, Cabugao, Ilocos Sur.

Linuktan ni Mr. Armando Azcueta, PTA President ti programa ket kimmablaaw para iti amin a nakipaset kadaytoy nga aktibidad  ken dagiti opisiales  ti Gobierno Munisipal nga idauluan ni Mayor Ediboy  a kankanayon a ka-koordinar ti eskuela iti aniaman a gannuat a para ti  pagsayaatan  dagiti agad-adal.

Daytoy nga aktibidad ket kulminasion ti Popularity Contest nga inangay ti nasao a pagadalan a nagbuligan dagiti mangisursuro ken nagannak/agay-aywan ti ubbing  nga insayangkat.

Insaad  ni Mayor Edgardo”Ediboy” S. Cobangbang, Jr. ken SB Member Vicky S. Serna ti korona da Ari Chester Jam P. Mendoza 1st ken Reyna Jury Anne A. Galamgam 1st idinto ta insaad da Vice Mayor Danny Q. Gazmen ken District Supervisor Helen V. Siruno ti capa ti Ari ken Reyna;  sash met ti inyawat da Mr. & Mrs. Ronald Mendoza ken Mr. & Mrs. Gary Galamgam; Scepter da  Outgoing-King John Victor de la Cruz ken Queen Maria Ferinah Formoso. Indonar da Mr. & Mrs. Richard Savellano ken Ms. Grace Galamgam dagiti tropeo.

Iti mensahe ni Mayor Ediboy, kinablaawanna dagiti agad-adal ken nagannak/agay-aywan ti anepda a nangigannuat ti  kastoy nga aktibidad. Pinadayawanna met dagiti mangisursuro nga idauluan ni Mrs. Estrelita M.  Siruno, School Principal 2 ta agtultuloy latta ti tunos dagiti mangtartarawidwid ti Cabugao North Central School kas pagwadan a pagadalan. Innayon ti Alkalde nga itultuloyda dagitoy a napintas a programa ken aktibidad  a mangmuli ti kinatao  dagiti agad-adal para iti naraniag a masakbayanda.

Binigbig ken pinadayawan met ni Mrs. Helen V. Siruno, Cabugao DepEd District Supervisor dagiti padana a mangisursuro ken iti  Gobierno Munisipal nga idauluan ni  Mayor Ediboy kasta met  ti Sangguniang Bayan a katinnulongda a mangilunglungalong ti pagsayaatan dagiti pagadalan iti sapasap a Cabugao.

Nagyaman met ni Mrs. Estrelita M. Siruno, Principal 2 iti amin a timmabuno a namag-balligi daytoy nga okasion ti pagadalanda. Nakitaripnong met ni SB Member Josefina S. Vallejo, Mrs. Linda Gazmen, Municipal Civil Registrar  ken Mrs. Melvi S. Sajonia, Principal,  Turod Elementary School. # (Web In-Action)

No comments:

Post a Comment