“LOVE TREE ORDINANCE”, AGTULTULOY A MAIPAKAT

Cabugao, Ilocos Sur – Agtultuloy a maipatpatungpal ti Municipal Ordinance No. 2004-02 a maaw-awagan ti “Love Tree Ordinance” a  naaprobaran a gakat ni Ex-SB Member, Dr. Cesar S. Soller, DVM iti Administrasion ni Pasado a Mayor Diocaesar S. Suero,  M.D.

Iti agdama nga Administrasion iti babaen ni Mayor Edgardo “Ediboy” S. Cobangbang, Jr., kalikaguman met ti Alkalde nga agtultuloy  a maipakat daytoy a linteg agsipud ta makatulong iti programa ti Gobierno Munisipal iti pannakaitandudo ti pannakapaberde ti aglawlaw ken pangep-ep ti epekto ti  climate change.

Dagiti sumaganad ti sinaguday ti nasao nga Ordinansa:

• Maobligar nga agmula ti uppat a kapuon ti kayo (seedling) ti agassawa sakbay a maaprobaran ti Marriage License-da.

• Mabayadan ti P5 ti kada puon ket magatang iti LGU Nursery wenno iti barangay nursery ti lugar dagiti agasawa.

• Maimula dagiti seedlings iti las-ud ti inaladan dagiti agassawa wenno disso a masakupan ti Munisipalidad.

• Maimula dagiti seedlings sakbay a maited ti lisensia ti panagasawa.

• Ti Barangay Captain ket mangted ti sertipikasion  no sadino ti nakaimulaan dagiti seedlings.

• Dagiti personnel ti Department of Agriculture ti mangmonitor ti panagdakkel dagiti naimula ken palagipanda dagiti agassawa iti regular a pannakamantener dagiti mulada. Mangisubmiter ti report ti DA iti kada tallo a bulan (quarterly) iti las-ud ti tallo a tawen. No adda matay a seedling a naimula  kabayatan daytoy a panawen ket maobligar ti agassawa a mangsugot. 

• Maited ti bayad ti seedling iti Municipal Treasurer wenno iti Barangay Treasurer.

• Amin a maibayad iti maimula a seedlings  ket   mainayon ken mausar   iti pannakamantener ti Municipal Nursery.

• Daytoy  a linteg  ket maawagan iti “Love Tree Ordinance”. # (Web In-Action)

Ladawan dagiti puon ti Mahogany nga natipon tipon iti Municipal Nursery